ەلوردادا كاراتە-دو WKF-تەن يۋنيورلار مەن جاستار اراسىندا قازاقستان رەسپۋبليكاسىنىڭ چەمپيوناتى ءوتتى, دەپ حابارلايدى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ.
جارىسقا ەلىمىزدىڭ ءار وڭىرىنەن 20-عا جۋىق كوماندادان 421 سپورتشى قاتىستى.
«كاراتە ەلىمىزدە عانا ەمەس الەمدە وتە جاقسى دامىپ جاتىر. ماسەلەن, 2022 جىلى وتكەن الەم چەمپيوناتىندا قازاقستان كومانداسى 129 مەملەكەتتىڭ ىشىنەن 5-ورىنعا تۇراقتادى. ال ازيا چەمپيوناتىندا جاپونيا مەملەكەتىنەن كەيىن ەكىنشى ورىنعا يە بولدىق. بۇل ءبىز ءۇشىن ۇلكەن ماقتانىش. الداعى ۋاقىتتا كاراتە سپورت ءتۇرىن دامىتۋ ماقساتىندا قولدان كەلگەننىڭ ءبارىن جاسايمىز», دەدى قازاقستان كاراتە-دو WKF فەدەراتسياسىنىڭ ۆيتسە-پرەزيدەنتى بولات حاۆلاحات.
كاراتە-دو WKF سپورت ءتۇرىن قازاقستان رەسپۋبليكاسىندا بۇقارالىق دامىتۋ ارقىلى كوپشىلىككە تاراتۋ مەن سپورتشىلاردىڭ سپورتتىق شەبەرلىگىن جوعارىلاتۋ جارىستىڭ باستى ماقساتى مەن مىندەتى بولىپ سانالادى.
«بۇگىنگى قازاقستان رەسپۋبليكاسىنىڭ چەمپيوناتىنداعى ءاربىرىمىزدىڭ باستى ماقساتىمىز – ءبىرىنشى ورىنعا يە بولۋ, چەمپيون اتانۋ. ەلىمىزدىڭ ءار وڭىرىنەن كەلگەن قارسىلاستارىم وسال ەمەس, مىقتى سپورتشىلار جەتەرلىك. ولاردىڭ قايسىسى بولماسىن جەڭىمپاز اتانۋعا لايىقتى», دەدى استانالىق قۇراما كوماندانىڭ سپورتشىسى ۆەنەرا جاقسىباەۆا.
تۋرنيردە التىن جۇلدەگە يە بولعان سپورتشىلار الەم چەمپيوناتىنا تىكەلەي جولداما الدى.