جۋىردا «قازاقستان زاڭگەرلەر وداعى» قوعامدىق بىرلەستىگىنىڭ كەڭسەسىندە ءماجىلىس پەن ءماسليحاتتار دەپۋتاتتارىنىڭ كەزەكتەن تىس سايلاۋى بويىنشا «ادال سايلاۋ ءۇشىن» شتاب مۇشەلەرىنىڭ وتىرىسى ءوتتى.
جيىندا «ادال سايلاۋ ءۇشىن» شتابىنىڭ جۇمىسى رەسمي تۇردە باستالعانى حابارلاندى. «قازاقستان زاڭگەرلەر وداعىنىڭ» مۇشەلەرى ەلىمىزدىڭ بارلىق ايماعىندا حالىققا سايلاۋ زاڭناماسىنىڭ نەگىزگى ەرەجەلەرىن تۇسىندىرەتىن بولادى. ء«ار ازامات تاڭداۋ جاساماس بۇرىن ءوز قۇقىعىن جەتىك ءبىلىپ, كانديداتتارعا ارتىلعان جۇكتى جەتە تۇسىنۋگە ءتيىس», دەيدى زاڭگەرلەر. سونداي-اق «ادال سايلاۋ ءۇشىن» شتابىنىڭ جۇمىسى بارىسىندا سايلاۋ ۇدەرىسىنە قاتىسۋشىلارعا قۇقىقتىق كومەك كورسەتىلەدى جانە ازاماتتىق قوعام مەن حالىقارالىق ۇيىم وكىلدەرىمەن بىرلەسە جۇيەلى جۇمىستاردى اتقارۋ جوسپارلانعان.
شتاب باسشىسى سەرىك اقىلباي 2004 جىلدان بەرى العاش رەت ماجىلىسكە كانديداتتار ءبىر مانداتتى وكرۋگتەر بويىنشا سايلاناتىنىن (98 دەپۋتاتتىڭ 29-ى), ەندى وبلىستىق اۋماقتىق سايلاۋ كوميسسيالارى كاسىبي نەگىزدە جۇمىس ىستەيتىنىن اتاپ ءوتتى. سونداي-اق ورتالىقتىڭ جۇمىسىنا توقتالدى. «ورتالىقتا 7 ادام بار, ولار – شتابتىڭ مۇشەلەرى. ءار وڭىردە پۋل قۇرعانبىز. وڭىرلەردە 150 ادام بار. ولار حالىقپەن كەزدەسەدى, ولاردىڭ سۇراقتارىنا جاۋاپ بەرەدى. ءبىز ەشقانداي ۇگىت-ناسيحات جۇمىسىن جۇرگىزبەيمىز. تەك قانا زاڭدى ءتۇسىندىرۋ, زاڭدىق كومەك بەرۋ سياقتى جۇمىستاردى اتقارامىز», دەيدى س.اقىلباي.
شتاب مۇشەسى ابدىكارىم اقجانوۆ ايەلدەر, جاستار جانە ەرەكشە قاجەتتىلىكتەرى بار ادامدار ءۇشىن 30 پايىزدىق كۆوتا بەلگىلەۋ تۋرالى, سونداي-اق ءماجىلىستىڭ جاڭا قۇرامىندا قازاقستان حالقى اسسامبلەياسىنىڭ كۆوتاسى بولمايتىنىن ايتتى. سول تۋراسىندا تۇشىمدى پىكىرلەرىن ورتاعا سالدى.
شتاب مۇشەسى دۋمان جامپەيىسوۆ ءماجىلىس پەن ءماسليحاتتار سايلاۋدا العاش رەت بيۋللەتەندەردە «بارلىعىنا قارسى» دەگەن باعان بار ەكەنىن, ەندىگى جەردە سايلاۋشىلار بەس بيۋللەتەن بويىنشا داۋىس بەرەتىنىن (رەسپۋبليكالىق ماڭىزى بار قالالاردا ءتورت بيۋللەتەن) جەتكىزدى.
شتاب مۇشەسى انۋاربەك سقاقوۆ 7 ساياسي پارتيانىڭ سايلاۋ ناۋقانىنا قاتىسۋعا قۇقىلى ەكەنىن ايتىپ, ولاردىڭ ەكەۋى پارتيالار تۋرالى زاڭنىڭ جاڭا نورمالارى كۇشىنە ەنگەننەن كەيىن تىركەلگەنىن, سونداي-اق پارتيالار مەن ۇكىمەتتىك ەمەس ۇيىمداردان عانا ەمەس, ءوزىن-ءوزى ۇسىنۋ ارقىلى دا ۇسىنۋ مۇمكىندىگىن ايتتى. سونىمەن قاتار پارتيالاردىڭ ءوتۋ شەگى 7-دەن 5%-عا دەيىن تومەندەتىلگەنىن اتاپ ءوتتى.