قازىرگى تاڭداعى ەلىمىزدەگى وزگەرىستەر, تۇراقتى دامۋدىڭ جاڭا ستراتەگيالىق باعىتتارى جانە قوعامنىڭ اشىقتىعى, ونىڭ جەدەل اقپاراتتانۋى, قارقىندىلىعى ءبىلىم بەرۋگە قويىلاتىن تالاپتاردى تۇبەگەيلى وزگەرتتى. ءبىلىم بەرۋدى جاڭارتۋ ۇستازداردىڭ جاۋاپكەرشىلىكتى ءتۇسىنۋى مەن كاسىبي دەڭگەيىنە جانە ءبىلىم بەرۋ ۇدەرىسىندەگى كوپتەگەن ماسەلەلەردى شەشۋگە قوسقان ۇلەسىنە بايلانىستى. سونىمەن بىرگە بۇل ءۇردىس وقۋشىلاردىڭ ءبىلىمىن عانا ەمەس, ونى ومىردە قولدانۋ داعدىلارىن, اتاپ ايتقاندا, فۋنكتسيونالدىق ساۋاتتىلىعىن دامىتادى.
وقۋشىلاردىڭ فۋنكتسيونالدىق دامۋى تۋرالى ماسەلە العاش رەت ەلباسىنىڭ 2012 جىلعى 27 قاڭتارداعى قازاقستان حالقىنا «الەۋمەتتىك-ەكونوميكالىق جاڭعىرتۋ – قازاقستاننىڭ دامۋىنىڭ نەگىزگى باعىتى» جولداۋىندا كوتەرىلگەن بولاتىن. وندا وسى ماسەلە بويىنشا بەسجىلدىق ۇلتتىق ءىس-قيمىل جوسپارىن قابىلداۋ تۋرالى ناقتى تاپسىرما قويىلدى. جولداۋعا بايلانىستى قازاقستان رەسپۋبليكاسى ۇكىمەتىنىڭ 2012 جىلعى 25 ماۋسىمداعى قاۋلىسىمەن «وقۋشىلاردىڭ فۋنكتسيونالدىق ساۋاتتىلىعىن دامىتۋ ءجونىندەگى 2012-2016 جىلدارعا ارنالعان ۇلتتىق ءىس-قيمىل جوسپارى» قابىلداندى.
فۋنكتسيونالدىق ساۋاتتىلىقتىڭ جالپى باعىتى رەتىندە جالپى ءبىلىم بەرۋ مەكتەپتەرىندەگى ازاماتتاردىڭ ينتەللەكتۋالدىق, رۋحاني جانە دەنە دامۋى, ولاردىڭ ءبىلىمىن الەمدەگى جىلدام وزگەرىس جاعدايىندا الەۋمەتتىك جاعدايعا بەيىمدەۋ قازاقستان رەسپۋبليكاسىندا ءبىلىم بەرۋدى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىندا اتاپ كورسەتىلگەن.
ۇلتتىق جوسپاردى ىسكە اسىرۋ مەملەكەتتىك ورگانداردىڭ, كاسىبي قوعامداستىقتاردىڭ, ۇكىمەتتىك ەمەس ۇيىمداردىڭ, ءبىلىم بەرۋ ۇيىمدارىنىڭ, پەداگوگ كادرلاردىڭ بىلىكتىلىگىن ارتتىرۋ ينستيتۋتتارىنىڭ, اتا-انالاردىڭ قىزمەتىن ۇيلەستىرۋدى قاجەت ەتەدى. وسىعان وراي جاقىندا «ورلەۋ» بىلىكتىلىكتى ارتتىرۋ ۇلتتىق ورتالىعى» اق وڭتۇستىك قازاقستان وبلىسى بويىنشا فيليالىندا «فۋنكتسيونالدىق ساۋاتتىلىق – ساپالى ءبىلىم بەرۋدىڭ كەپىلى» تاقىرىبىندا رەسپۋبليكالىق عىلىمي-پراكتيكالىق كونفەرەنتسيا وتكىزىلدى. ونىڭ جۇمىسىنا «ءورلەۋ» باۇو» اق ديرەكتورلار كەڭەسىنىڭ توراعاسى م.ابەنوۆ, باسقارما توراعاسىنىڭ ورىنباسارى, پروفەسسور ج.قاراەۆ, قوعام فيليالدارىنىڭ ديرەكتورلارى, ءبىلىم سالاسىنىڭ عالىمدارى, جوعارى وقۋ ورىندارى, كوللەدج جانە ءبىلىم بەرۋ ۇيىمدارىنىڭ باسشىلارى, بىلىكتىلىكتى ارتتىرۋ ينستيتۋتتارىنىڭ وقىتۋشىلارى قاتىسىپ, پىكىر الماستى.
«ورلەۋ» باۇو» اق وڭتۇستىك قازاقستان وبلىسى بويىنشا فيليالى پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتىندا وتاندىق جانە شەتەلدىك تاجىريبەلەردى ءوڭىر مەكتەپتەرىنە تاراتۋعا قابىلەتتى, بىلىكتى دە ءبىلىمدى مامانداردىڭ ۇلكەن الەۋەتى شوعىرلانىپ كەلەدى. سونىمەن قاتار, ينستيتۋت مەملەكەت بەلگىلەگەن ءبىلىم بەرۋدى دامىتۋدىڭ جاڭا باعىتتارىن جۇزەگە اسىرۋدا. اتاپ ايتقاندا ولار – جاڭا مازمۇنداعى قىسقا مەرزىمدى بىلىكتىلىكتى ارتتىرۋ كۋرستارى, نازارباەۆ زياتكەرلىك مەكتەپتەرى مەن كەمبريدج ۋنيۆەرسيتەتى بىرىگىپ دايارلاعان دەڭگەيلىك باعدارلامالار, ە-learning جانە Smart-learning ۇدەرىستەرىن ەنگىزۋ, حالىقارالىق ىنتىماقتاستىقتى دامىتۋ, الەمدىك تاجىريبە نەگىزىندە ينستيتۋت قىزمەتكەرلەرىنىڭ بىلىكتىلىگىن ارتتىرۋ, اعىلشىن ءتىلىن ەرتە جاستان وقىتۋ, كوپتىلدى تۇلعانى قالىپتاستىرۋ بولىپ وتىر.
پلەنارلىق ماجىلىستە وقۋ جىلىنىڭ قورىتىندىسى بويىنشا وبلىستىڭ ءبىلىم ۇزدىكتەرىن ماراپاتتاۋ ءراسىمى ءوتتى. كونفەرەنتسيا جۇمىسى دوڭگەلەك ۇستەلمەن, شەبەرلىك سىنىپتارمەن جانە ترەنينگتەرمەن جالعاستى. مۇندا وقۋشىلاردىڭ فۋنكتسيونالدىق ساۋاتتىلىعىن قالىپتاستىرۋ مەن دامىتۋعا باعىتتالعان ءبىلىم ءۇردىسىن ۇيىمداستىرۋ قاعيداتتارىن جانە زاماناۋي ءبىلىم تەحنولوگيالارىن تالقىلاۋعا ەرەكشە نازار اۋدارىلدى. سونىمەن, القالى جيىنعا قاتىسۋشىلار ۇلكەن سەنىم ارقالاپ قايتتى.
لاۋرا يسكاكوۆا,
«ورلەۋ» باۇو» اق وڭتۇستىك قازاقستان وبلىسى بويىنشا
فيليالىنىڭ ديرەكتورى.