قازاقستاننىڭ كوز مەرگەن سپورتشىلارى جاكارتاداعى ۆينتوۆكا جانە تاپانشادان نىسانا كوزدەۋدەن الەم كۋبوگىندە ءساتتى ونەر كورسەتىپ جاتىر.
سپورتتى دامىتۋ ديرەكتسياسىنىڭ ءباسپاسوز قىزمەتى تاراتقان اقپارات بويىنشا جارىستىڭ كەزەكتى كۇنىندە قازاقستاننىڭ ەرلەر قۇراماسى 10 مەتردەن پنەۆماتيكالىق تاپانشادان نىسانا كوزدەۋدە كۇمىس جۇلدەگەر اتاندى. جەرلەستەرىمىز باس جۇلدە ءۇشىن وتكەن فينالدىق ماتچتا تۇركيا مەرگەندەرىمەن شەبەرلىك بايقاسىپ, قارسىلاستارىنا 16:2 ەسەبىمەن جول بەردى. ۇلتتىق قۇراما ساپىندا نيكيتا چيريۋكين, الەكسەي لوتارەۆ, ۆالەري راحيمجان ونەر كورسەتتى.
بۇل – الەم كۋبوگىندە قازاقستان مەرگەندەرى جەڭىپ العان بەسىنشى مەدال. قازىرگى ۋاقىتتا ەل قورجىنىندا 1 التىن, 3 كۇمىس جانە 1 قولا جۇلدە بار. بۇل كورسەتكىشپەن وتانداستارىمىز جالپىكوماندالىق ەسەپتە 3-ورىندا كەلەدى. جاكارتاداعى باسەكەدە ەل نامىسىن 15 سپورتشىمىز قورعاپ جاتىر.