پرەزيدەنت ەلوردانى دامىتۋ ماسەلەلەرى جونىندەگى كەڭەس وتىرىسىندا جاياۋ جۇرگىنشىلەرگە ارنالعان كوشەلەردى كوبەيتۋ قاجەت ەكەنىن ايتتى, دەپ حابارلايدى Egemen.kz.
«استانا تۇرمىسقا جايلى شاھار بولۋى كەرەك. ەڭ الدىمەن, قالانى دامىتۋ تۇجىرىمداماسىن قايتا قاراعان ءجون. قازىر استانادا ساياباقتار جەتىسپەيدى. تۇرعىندار سەرۋەنگە شىعاتىن, دەمالاتىن ورىندار از.
بىراق قالا اكىمدىگى مۇنى ەسكەرمەي, قۇرىلىسقا رۇقسات بەرەدى. بوس تۇرعان جەرگە بىردەن تۇرعىن ءۇي سالىنادى. ساياباقتاردى, جاياۋ ادامعا ارنالعان كوشەلەردى كوبەيتۋ قاجەت. قالانى جوسپارلاعان كەزدە مۇنىڭ ءبارىن الدىن-الا ويلاستىرۋ كەرەك», دەدى مەملەكەت باسشىسى.
سونىمەن قاتار قاسىم-جومارت توقاەۆ ەسىلدىڭ جاعاسىنا دۇرىس كوڭىل بولىنبەي وتىرعانىنا نازار اۋداردى.
«ماسەلەن, كورشى ەلدەگى قازان قالاسىنىڭ تاجىريبەسىن زەرتتەپ كورۋگە بولادى. بۇل قالانىڭ كوشەلەرى, ساياباقتارى جانە جاعالاۋ الاڭدارى وتە ادەمى جانە تارتىمدى. ءبىزدىڭ ماقساتىمىز – ەلوردامىزدى جىلدىڭ كەز كەلگەن مەزگىلىندە حالقىمىزعا جانە شەتەل ادامدارىنا بارىنشا قولايلى ەتۋ, استانانىڭ كەلبەتىن مەيلىنشە جاقسارتۋ», دەپ تۇيىندەدى ەل پرەزيدەنتى.