قاڭتاردىڭ 30-نان 31-ىنە قاراعان ءتۇنى№28 مەكتەپ-ليتسەيىندە ءورت شىقتى. الدىن الا سەبەپ - سىنىپتاعى ەلەكتر قالقانىنىڭ قىسقا تۇيىقتالۋى. ءتۇتىندى جويۋعا ارەكەتتەنگەن مەكتەپ كۇزەتشىسى كومىرقىشقىل گازىنان ۋلانىپ قالدى, دەپ حابارلايدى Egemen.kz.
بۇگىندە عيماراتتىڭ ءبىر بولىگى توقسىزداندى. بقو توتەنشە جاعدايلار دەپارتامەنتىنىڭ ءباسپاسوز قىزمەتىنەن تۇسكەن مالىمەتكە قاراعاندا, ءورت اۋماعى 15 شارشى مەتردى قۇراعان. ماماندار ءورتتىڭ ناقتى سەبەبىن انىقتاپ جاتىر.
«ماعان مەكتەپتە ءورت شىققانى تۋرالى تۇندە حابارلاندى. ساعات 00:30-دا مەن سوندا بولدىم. ازىرگە شىعىن كولەمىن ايتا المايمىز. بۇرىن ەلەكتر سىمدارىنا قاتىستى ماسەلە تۋىنداماعان, توتەنشە جاعدايلار ماماندارى ۇنەمى كەلىپ, تەكسەرەتىن. عيمارات 1992 جىلى سالىنعان. ءبىزدىڭ وقۋشىلار بۇگىن قاشىقتان وقىتۋعا كوشتى, مۇعالىمدەر دە ۇيدەن جۇمىس ىستەيدى. ەرتەڭ ادەتتەگىدەي وقيمىز دەپ ۇمىتتەنەمىز. بىزدە 5-11 سىنىپ ارالىعىنداعى 525 بالا وقيدى», دەيدى مەكتەپ ديرەكتورىنىڭ مىندەتىن اتقارۋشى ءاليا دۇيسىگاليەۆا.
ەسىنەن تانعان كۇزەتشىنى جەدەل جاردەم الىپ كەتكەن. 64 جاستاعى ەر ادام جانساقتاۋ بولىمىندە جاتىر. دارىگەرلەر وعان كومىرقىشقىل گازىنان اۋىر ۋلانۋ دياگنوزىن قويدى, ونىڭ جاعدايى وتە اۋىر.
وقيعا ورنىندا 50-دەن استام ءورت ءسوندىرۋشى جۇمىس ىستەدى. ءورت ساعات 00:40-تا ءسوندىرىلدى.