2-3 اقپاندا الماتىدا ەۋرازيالىق ۇكىمەتارالىق كەڭەستىڭ كەزەكتى وتىرىسى جانە جىل سايىنعى «تسيفرلىق الماتى 2023» فورۋمى وتەدى, دەپ حابارلايدى Egemen.kz.
«ەۋرازيالىق ۇكىمەتارالىق كەڭەس وتىرىسىنا ارمەنيا, بەلارۋس, قازاقستان, قىرعىزستان, رەسەي ۇكىمەتتەرىنىڭ باسشىلارى جانە ەۋرازيالىق ەكونوميكالىق كوميسسيا القاسىنىڭ توراعاسى قاتىسادى. ءىس-شاراعا ەاەو جانىنداعى باقىلاۋشى مەملەكەتتەردىڭ وكىلدەرى, تمد باس حاتشىسى, ەۋرازيالىق دامۋ بانكى مەن ەۋرازيالىق تۇراقتاندىرۋ جانە دامۋ قورىنىڭ باسشىلارى دا شاقىرىلعان», دەدى سىرتقى ىستەر مينيسترلىگىنىڭ رەسمي وكىلى ايبەك سمادياروۆ.
ونىڭ ايتۋىنشا, كۇن تارتىبىندە ساۋدا-ەكونوميكالىق ىنتىماقتاستىق, تەحنيكالىق رەتتەۋ, ەاەو ينتەگراتسيالانعان اقپاراتتىق جۇيەسى جانە باسقا دا وزەكتى ماسەلەلەر بار.
شارا بارىسىندا ۇكىمەت باسشىلارى ۆاليۋتالىق قاتىناستاردى رەتتەۋ مەن ىرىقتاندىرۋ شارالارىن قابىلداۋدىڭ كەلىسىلگەن تاسىلدەرى تۋرالى كەلىسىمگە قول قويادى.
ەكىنشى كۇنى ەاەو ەلدەرىنىڭ پرەمەر-مينيسترلەرى جىل سايىنعى «تسيفرلى الماتى» فورۋمىنىڭ پلەنارلىق وتىرىسىنا قاتىسادى. ءداستۇرلى تۇردە فورۋمعا كورنەكتى ساياسي جانە قوعام قايراتكەرلەرى, ءىرى تسيفرلىق كومپانيالاردىڭ باسشىلارى, IT-بيزنەس كوشباسشىلارى مەن تسيفرلىق سالا ساراپشىلارى قاتىسادى. بيىلعى جىلى وسى شارا اياسىندا Digital Almaty ماراپاتتاۋ راسىمىمەن تاقىرىپتىق جوبالاردىڭ حالىقارالىق كورمەسى دە وتەدى.