قوستانايدا ەسىرتكى ساۋداسىمەن اينالىسقان ستۋدەنتتەر ۇستالدى

پوليتسيانىڭ حابارلاۋىنشا, ەسىرتكىنى جاسىرىن جەرلەردە تاراتۋ جازاسى اۋىر. قىلمىس انىقتالعان جاعدايدا قىلمىسكەردىڭ مۇلكى تاركىلەنىپ, 10-15 جىلعا دەيىن باس بوستاندىعىنان ايىرىلۋى مۇمكىن.

«جەدەل-ىزدەستىرۋ ءىس-شارالارىن جۇرگىزۋ كەزىندە ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى قوستاناي قالاسىنداعى كوللەدجدەردىڭ ءبىرىنىڭ ستۋدەنتتەرىن ۇستادى. ولار ەسىرتكىنى ۇيلەردىڭ كىرەبەرىسىنە, ونىڭ ىشىندە پوشتا جاشىكتەرىنە تىعىپ قويعان. بۇل قىلمىستىق ارەكەتتە ءۇش ستۋدەنت قىز دا ەسىرتكى تاراتىپ جۇرگەن ساتىنەن ۇستالدى», دەيدى وبلىستىق پوليتسيا دەپارتامەنتى باستىعىنىڭ ورىنباسارى دۇيسەمباي بايبۇسىنوۆ.

ءتىنتۋ كەزىندە ستۋدەنتتەردەن اق ءتۇستى ۇنتاق زاتى بار 50 بۋما تاركىلەندى. كەيىن جالدامالى پاتەردى ءتىنتۋ كەزىندە 192 گرامم سينتەتيكالىق «مەفەدرون» ەسىرتكى زاتى تابىلىپ, تاركىلەندى. بۇل دەپارتامەنتتە انىقتالعانداي, وتە ۇلكەن مولشەر. قازىرگى ۋاقىتتا كۇدىكتىلەر قر قىلمىستىق ءىس جۇرگىزۋ كودەكسىنىڭ 128-بابىنا سايكەس ۋاقىتشا ۇستاۋ يزولياتورىنا قامالدى.

«جەدەل ىزدەستىرۋ ءىس-شارالارى بارىسىندا 23 جاستاعى كۇدىكتى ۇستالدى, ونىڭ دا وسى قىلمىستىق ارەكەتكە قاتىسى بار. ءتىنتۋ كەزىندە ودان جالپى سالماعى 20,08 گرامم بولاتىن ەسىرتكى پسيحوتروپتىق زاتى تاركىلەندى. ۇستالعان ادام قاماۋعا الىندى», دەپ جالعاستىردى پوليتسيا پولكوۆنيگى.

اتالعان فاكتىلەر بويىنشا سوتقا دەيىنگى تەرگەۋ امالدارى باستالدى.