ەلىمىزدىڭ «جاسىل» ەكونوميكاعا كوشۋ» تۇجىرىمداماسىن ىسكە اسىرۋ اياسىندا مينيسترلىك جاڭارتىلاتىن ەنەرگيا كوزدەرىن دامىتۋدىڭ نىسانالى ينديكاتورلارى مەن ولارعا قول جەتكىزۋ جولدارىن بەلگىلەدى. ماسەلەن, 2020 جىلعا قاراي ەلىمىزدە جاڭارتىلاتىن ەنەرگيا كوزدەرىنەن وندىرىلگەن قۋات ۇلەسى 3 پايىزدى قۇرايدى. بىلتىر جاڭارتىلاتىن ەنەرگيا كوزدەرىن پايدالانۋدى قولداۋ تۋرالى زاڭعا تۇزەتۋلەر ەنگىزىلدى.
«بۇل تىركەلگەن تاريفتەر شاماسىن ەسەپتەپ, سەكتوردى قولداۋ شارالارىن ەنگىزۋگە مۇمكىندىك بەردى. بەلگىلەنگەن شارالار قازاقستاندا جاڭارتىلاتىن ەنەرگيا كوزدەرى رىنوگىن قالىپتاستىرۋعا جاعداي تۋعىزادى.
مامىر ايىندا ۇكىمەت ءبىز ۇسىنعان تىركەلگەن تاريفتەر شامالارىن ماقۇلدادى. جەل ەلەكتر ستانسالارىندا وندىرىلەتىن قۋاتتىڭ كيلوۆاتت ساعاتىنا 22,68 تەڭگە تولەنسە, كۇن ەلەكتر ستانساسى قۋاتىنىڭ باعاسى – 1 كيلوۆاتت ساعاتىنا 34,61 تەڭگە. شاعىن سۋ ەلەكتر ستانسالارىندا وندىرىلگەن قۋاتتىڭ كيلوۆات ساعاتىنا 16,71 تەڭگە, بيوگاز قوندىرعىلارىنىڭ قۋاتىنىڭ كيلوۆاتت ساعاتى 32,23 تەڭگەگە باعالاندى. سونىمەن قاتار, وتاندىق ءوندىرۋشىنى قولداۋ ماقساتىندا ەلىمىزدە وندىرىلگەن كرەمني نەگىزىندەگi فوتوەلەكترلىك مودۋلدەردى پايدالاناتىن كۇن ەلەكتر ستانسالارىنىڭ تىركەلگەن ءتاريفى ەنگىزىلدى.
وسىنداي ستانسالاردا وندىرىلگەن قۋاتتىڭ كيلوۆاتت ساعاتى 70 تەڭگە تۇرادى. تىركەلگەن تاريفتەردىڭ قولدانىلۋ مەرزىمى – 15 جىل. ولار ۇكىمەت بەلگىلەگەن تارتىپپەن, ينفلياتسيا دەڭگەيىنە قاراي, جىل سايىن يندەكستەلەدى. وسى جايلاردى ورتالىق كوممۋنيكاتسيالار قىزمەتىندە وتكەن كەزەكتى بريفينگتە قورشاعان ورتا جانە سۋ رەسۋرستارى ءمينيسترى نۇرلان قاپپاروۆ مالىمدەدى. سونداي-اق, ول تىركەلگەن تاريفتەر ينۆەستورلاردىڭ قىزىعۋشىلىعىن ارتتىرىپ, جاڭارتىلاتىن ەنەرگيا كوزدەرى نارىعىنا تارتۋ ماقساتىندا ەنگىزىلىپ وتىرعانىن دا اتاپ كورسەتتى.
باسقوسۋدا مينيستر ورمان جانە اڭشىلىق شارۋاشىلىقتارى سەكتورىن دامىتۋ, اعىمداعى اتقارىلاتىن ناقتى ىستەر, سونىمەن بىرگە, جانۋارلار الەمىن قورعاۋ ماسەلەلەرى جايىنا دا توقتالدى. ورمان جانە اڭشىلىق شارۋاشىلىقتارى سەكتورىن دامىتۋ مىندەتتەرى قازىر ازىرلەنىپ جاتقان 2020 جىلعا دەيىنگى ەكونوميكانىڭ ورمان سەكتورىن دامىتۋ جونىندەگى باعدارلامادا بەلگىلەنبەك.
مەملەكەتتىك ورمان شارۋاشىلىعى مەن تابيعاتتى قورعاۋ ۇيىمدارىنىڭ كۇشىمەن كوكتەمگى ماۋسىم بارىسىندا 34 مىڭ گەكتار جەرگە اعاش وتىرعىزىلعان. سونىمەن قاتار, ەل اۋماعىنداعى ورمانداردى ساقتاۋ جانە كوبەيتۋ جوباسى اياسىنداعى جۇمىستار جاسالۋدا. جوبا اياسىندا ارال تەڭىزىنىڭ قۇرعاعان بولىگىندە فيتومەليوراتسيالىق شارالار جۇرگىزىلىپ, اۋدانى 10,6 مىڭ گەكتار جەرگە سەكسەۋىل وتىرعىزىلعان.
«سەمەي ورمانى» مەملەكەتتىك تابيعي رەزەرۆاتى اۋماعىندا ورمان اعاشتارىنىڭ كوشەتتەرى وسىرىلەتىن كەشەننىڭ قۇرىلىسى اياقتالىپ كەلەدى. ونى قاراشا ايىندا ىسكە قوسۋ جوسپارلانعان.
مينيسترلىك ەكولوگيالىق ءىس-شارالارعا قالىڭ جۇرتشىلىقتى تارتۋ ءۇردىسىن جالعاستىرىپ كەلەدى. كوكتەمدە ەلىمىزدە جەر كۇنى مەن قورشاعان ورتانى قورعاۋ كۇنىنە وراي ورمان وتىرعىزۋ اكتسياسى ءوتىپ, وعان 226 مىڭنان استام ادام قاتىستى. ەلىمىزدىڭ قالالارى مەن اۋىلدى ايماقتارىندا 662 مىڭ اعاش ەگىلگەن. حالىقتى ەكولوگيالىق اعارتۋ جانە ەرەكشە قورعالاتىن تابيعي اۋماقتار پروبلەمالارىنا قوعام نازارىن اۋدارۋ ماقساتتارىندا ەلىمىزدىڭ بارلىق تابيعات قورعاۋ ۇيىمدارى 23 ناۋرىز بەن 5 ماۋسىم ارالىعىندا «ساياباقتار مارشى-2014» اكتسياسىن وتكىزدى. كوكتەمدە كيىك مەكەندەيتىن اۋماقتاردا جانۋارلاردى ەسەپتەۋ ناۋقانى جۇرگىزىلىپ, ناتيجەسىندە بىلتىرعى كورسەتكىشتەرمەن سالىستىرعاندا قازاقستاندى مەكەن ەتكەن كيىك سانى 37 پايىزعا ارتىپ, 256 مىڭ باستان اسقانى انىقتالعان.
ءابدىراحمان قىدىربەك,
«ەگەمەن قازاقستان».