ۇكىمەتتە اباي وبلىسىنىڭ كەشەندى جوسپارى قارالدى

«جوسپاردا 100-دەن استام ءىس-شارا قامتىلعان. جوسپاردىڭ جالپى بيۋدجەتى 1,9 ترلن تەڭگەگە جۋىق. ولاردىڭ باسىم بولىگى – جەكە ينۆەستيتسيالار. تۋريزم سالاسىن دامىتۋ اياسىندا سەمەيدە ەكى جاڭا ساۋدا ويىن-ساۋىق ورتالىعى مەن قوناق ءۇي كەشەنىن, سونداي-اق الاكول جاعالاۋىندا دەمالىس بازاسىن سالۋ جوسپارلانىپ وتىر. جىلۋ كوزدەرىن, ەلەكتر جانە سۋمەن جابدىقتاۋ جەلىلەرىن, كارىز-تازارتۋ قۇرىلىستارىن, كۇرە جولدار مەن كوپىرلەردى رەكونسترۋكتسيالاۋ, سەمەيدە زاماناۋي جەو سالۋ بويىنشا قادامدار كوزدەلگەن», دەلىنگەن ۇكىمەت حابارلاماسىندا.

سونىمەن قاتار, «اياگوز-باقتى-قىتاي شەكاراسى» تەمىرجول ۋچاسكەسى, تاۋ-كەن بايىتۋ كومبيناتى, «ايدارلى» مىس كەن ورنىن يگەرۋ, ەت كومبيناتى, «قۇرعاق» پورت جانە لوگيستيكالىق پارك سياقتى ءىرى جوبالار ىسكە اسىرىلادى.

كەشەندى جوسپار وڭىردەگى ونەركاسىپ كولەمى مەن اۋىل شارۋاشىلىعى ءونىمىن 1,5 ەسەگە, نەگىزگى كاپيتالعا سالىناتىن ينۆەستيتسيالاردىڭ 3,5 ەسەگە ءوسۋىن قامتاماسىز ەتەدى. 14 مىڭ جۇمىس ورنى قۇرىلادى.

«كەشەندى جوسپار جەرگىلىكتى حالىقتىڭ تۇرمىس ساپاسىن جاقسارتۋعا مۇمكىندىك بەرەدى», دەپ اتاپ ءوتتى پرەمەر-مينيستر ءاليحان سمايىلوۆ.