اقش-تىڭ لەيك-پلەسيد قالاسىندا ءوتىپ جاتقان ححح قىسقى دۇنيەجۇزىلىك ۋنيۆەرسيادادا قازاقستان قۇراماسىنىڭ قورجىنىنا تۇسكەن مەدالدار سانى سەگىزگە جەتتى.
سەنبى كۇنى شاڭعىمەن تۇعىردان سەكىرۋشىلەردىڭ كوماندالىق سايىسىندا جەرلەستەرىمىز كۇمىس مەدال يەلەندى. قازاقستان قۇراماسىنىڭ ساپىندا دانيل ۆاسيلەۆ پەن سەرگەي تكاچەنكو ونەر كورسەتتى. ولار 470,3 ۇپاي جينادى. بۇل تارتىستا باس جۇلدەنى اۋستريا جەڭىپ السا, قولا مەدال جاپونياعا بۇيىردى. ءدال سول باسەكەدە سۆياتوسلاۆ نازارەنكو مەن نيكيتا دەۆياتكين جۇبى جەتىنشى ورىنعا تابان تىرەدى.
شورت-ترەكتەن وتكەن جارىستا تاعى جۇلدە الۋىمىزعا تاماشا مۇمكىندىك بولدى. ايەلدەردىڭ 500 مەترلىك سايىسىندا يانا حان جەڭىس تۇعىرىنا ءبىر قادام جەتپەي قالىپ, ءتورتىنشى ورىندى قاناعات تۇتتى. بۇل تارتىس وڭتۇستىك كورەيانىڭ وكىلى چحۆە مين دجوننىڭ ايقىن جەڭىسىمەن اياقتالدى. ونىڭ وتانداسى پاك دجي يۋن قولاعا قول سوزسا, قىتايلىق يچاو ۆان كۇمىسپەن كۇپتەلدى.
كوپ كەشىكپەي مۇحيتتىڭ ارعى جاعالاۋىنان تاعى ءبىر قۋانىشتى حابار جەتتى. قۇرامىندا يانا حان, مالىك ەرمەك, الينا اجعاليەۆا, الىشەر ابۋلقاتىموۆ, ءادىل عالياحمەتوۆ جانە ەركەبۇلان شامۇحانوۆ سىندى شورت-ترەكشىلەرى بار قازاقستان كومانداسى ارالاس ەستافەتانىڭ جۇبانىش فينالىندا ءبىرىنشى ورىندى يەلەندى. ولاردىڭ كورسەتكىشى – 2:47.757. بىراق باستى فينالدا ونەر كورسەتكەن وڭتۇستىك كورەيا, اقش جانە قىتاي سپورتشىلارىنىڭ بارلىعى دا ەرەجەنى ورەسكەل بۇزعانى ءۇشىن جارىستان شەتتەتىلدى. ناتيجەسىندە, باس جۇلدەنى فرانتسيا قۇراماسى ولجالاسا, وتانداستارىمىز كۇمىس مەدال ەنشىلەدى. ال قولا جۇلدە جاپوندارعا بۇيىردى.
جەكسەنبىدە بياتلونشىلاردىڭ 15 شاقىرىمدىق ماسس-ستارتىندا الەكساندر مۋحين كۇمىس مەدال يەلەندى. ول فرانتسيالىق اكسەل گارنەدەن عانا قالىپ قويدى. قولا مەدالدى نورۆەگيالىق ەريان موسەنگ ەنشىلەدى. ءدال وسى باسەكەدە قازاقستاننىڭ وزگە سپورتشىلارى مىنداي ساتىلارعا جايعاستى: كيريلل باۋەر – 4, ۆاديم كۋرالەس – 7 جانە بەكەنتاي تۇرلىبەكوۆ – 19.
ەستەرىڭىزگە سالا كەتەيىك, بۇعان دەيىن بياتلونشى ۆاديم كۋرالەس پەن بەكەنتاي تۇرلىبەكوۆ جانە شاڭعىمەن تۇعىردان سەكىرۋشى دانيل ۆاسيلەۆ الدارىنا جان سالماي, التىن تۇعىرعا كوتەرىلگەن ەدى. بياتلوندى سەرىك ەتكەن ەلىمىزدىڭ تاعى ءبىر دارىندى سپورتشىسى الەكساندر مۋحين مەن قۇرامىندا ايشا راقىشەۆا, نادەجدا ستەپاشكينا جانە كسەنيا شالىگينا سىندى شاڭعىشىلارى بار ەلىمىزدىڭ ايەلدەر قۇراماسى ەستافەتادا قولا مەدالدى مويىندارىندا جارقىراتتى.
قازاقستاننىڭ شايبالى حوككەيشىلەرى وڭتۇستىك كورەيا (5:1), ماجارستان (9:1), ۇلىبريتانيا (15:1) جانە سلوۆاكيانىڭ (4:1) تاس-تالقانىن شىعارعانىن ءبىز بۇعان دەيىن دە حابارلاعانبىز. توپتىق ءتۋرنيردىڭ سوڭعى ويىنىندا اقش-قا (1:4) ەسە جىبەردىك. سوعان قاراماستان جەرلەستەرىمىز پلەي-وففقا شىقتى. جارتىلاي فينالدا كانادامەن كۇش سىناستى. بۇل باسەكەدە ۇيەڭكى جاپىراقتار ەلى وكىلدەرىنىڭ مىسى باسىم بولدى. ولار ءبىزدىڭ قاقپامىزدى ءتورت مارتە ءدال كوزدەدى. عالىم مامبەتاليەۆتىڭ شاكىرتتەرى ءبىر عانا گولمەن جاۋاپ بەردى. ەسەپ – 1:4. ەندى وتانداستارىمىز جاپونيامەن قولا مەدال ءۇشىن تالاسادى. ال باس جۇلدە ءۇشىن تارتىس اقش پەن كانادا قۇرمالارى اراسىندا وتەدى.