قۇرلىقتىق حوككەي ليگاسىندا (قحل) كۇش سىناسىپ جۇرگەن استانانىڭ «بارىسى» كەزەكتى تۋر ويىنىن ەكاتەرينبۋرگتە جەرگىلىكتى «اۆتوموبيليسپەن» وتكىزدى.
سونىڭ الدىندا عانا جەرلەستەرىمىز چەليابىدە «تراكتوردى» وۆەرتايمدا 3:2 ەسەبىمەن ۇتىپ, ءوز جانكۇيەرلەرىن ءبىر قۋانتىپ تاستاعان ەدى. وسى جولى دا «بارىستان» جەڭىس كۇتتىك. ويتكەنى الدا – گاگارين كۋبوگى جولىنداعى جارىس. الا-قۇلا ونەر كورسەتىپ جۇرگەن ەلوردالىق كلۋب وعان قاتىسا ما, الدە جوق پا, ول جاعى ءالى بەلگىسىز. سول سەبەپتى دە قازىرگى كەزدە ءاربىر ۇپاي بىزدەر ءۇشىن وتە قۇندى. ايتقانداي-اق, «اۆتوموبيليسپەن» كەزدەسۋگە دە استانالىقتار تاس-ءتۇيىن دايارلىقپەن كەلگەن ەكەن. بۇل باسەكەدە «بارىستىڭ» ويىنشىلارى اراسىنان انتون ساگادەەۆ دۋبل اۆتورى اتانسا, ەگور پەتۋحوۆ, دميتري شەۆچەنكو جانە دجەرەمي براككو ءبىر-ءبىر گولدان سوقتى. ايدىن يەلەرى ءۇش گولمەن عانا جاۋاپ بەردى. ناتيجەسىندە ەلوردالىق كلۋب 5:3 ەسەبىمەن جەڭىسكە جەتتى.
قازىرگى كەزدە 55 كەزدەسۋدەن كەيىن 52 ۇپاي جيعان «بارىس» تۇراقتى بىرىنشىلىكتىڭ جارىس كەستەسىندە 16-ورىندى يەلەنۋدە. ەندى ولار كەلەسى كەزدەسۋىن بۇگىن ماگنيتوگورسكىنىڭ «مەتاللۋرگىمەن» وتكىزەدى.