مەلبۋرندە ءوتىپ جاتقان اۋستراليانىڭ اشىق بىرىنشىلىگىنىڭ جەكەلەگەن سايىسىندا قازاقستاننىڭ ءبىر عانا تەننيسشىسى قالدى. ول – ەلىمىزدىڭ ءبىرىنشى راكەتكاسى ەلەنا رىباكينا.
الەكساندر بۋبليك ءبىرىنشى جانە يۋليا پۋتينتسەۆا ەكىنشى اينالىمنان اسا الماعاننان كەيىن جاسىل قۇرلىقتاعى جالعىز ءۇمىتىمىز ەلەنا رىباكينا ەدى. باستاپقى باسەكەلەرىندە يتاليالىق ەليزابەتتا كوچچارەتتو مەن سلوۆەنيالىق كايا يۋۆاندى شاڭ قاپتىرىپ كەتكەن ول ءۇشىنشى كەزەڭدە WTA تىزىمىندە 11-ورىندا تۇرعان امەريكالىق دانيەل كوللينزبەن كۇش سىناستى. بۇل تارتىس 6:2, 5:7, 6:2 ەسەبىمەن جەرلەسىمىزدىڭ پايداسىنا شەشىلدى. ءتورتىنشى كەزەڭدە ايگىلى يگا شۆەنتەكپەن شەبەرلىك بايقاستى. الەمدىك رەيتينگتە كوش باستاپ تۇرعان 21 جاستاعى پولياك قىزى 2020 جانە 2022 جىلدارى رولان گارروستا توپ جارعان. بىلتىر US Open دوداسىندا باس جۇلدەنى ولجالاپ, اۋستراليانىڭ اشىق بىرىنشىلىگىنىڭ جارتىلاي فينالىنا دەيىن جەتتى. ودان بولەك, WTA-نىڭ 11 ءتۋرنيرىن ۇتتى. مىنە, وسىنداي مىقتى ويىنشىمەن ەش قايمىقپاي ايقاسقان ەلەنا ءبىر جارىم ساعاتقا سوزىلعان سايىستا 6:4, 6:4 ەسەبىمەن جەڭىسكە جەتتى. ەندى رىباكينا شيرەك فينالدا لاتۆيالىق ەلەنا وستاپەنكومەن شەبەرلىك بايقاسادى.