فرانتسيانىڭ نيتستسا قالاسىندا كۇرەس تۇرلەرىنەن 1924 جىلى پاريج وليمپياداسىنىڭ جەڭىمپازى اتانعان اتاقتى بالۋان انري دەگلاندى ەسكە تۇسىرۋگە ارنالعان گران-پري ءتۋرنيرى اياقتالدى.
اتالعان جارىستا ەلميرا سىزدىقوۆا تابىستى ونەر كورسەتتى. كەزىندە بۇل سپورتشىمىز ازيا چەمپيوناتىندا التى (1 التىن+2 كۇمىس+3 قولا) جۇلدەنى ولجالاپ, ازيا ويىندارىندا قولا مەدالدى قورجىنعا سالدى. 2016 جىلى برازيليانىڭ ريو-دە-جانەيرو قالاسىندا الاۋى تۇتانعان وليمپيا ويىندارىندا ءۇشىنشى ورىنعا تابان تىرەدى. ودان بولەك, سىزدىقوۆانىڭ باسقا اسا ءىرى حالىقارالىق دودالاردا جەڭىپ العان جۇلدەلەرى جەتەرلىك. بىراق اۋىر جاراقات الۋىنا بايلانىستى بىلتىر ول بىردە-ءبىر جارىسقا قاتىسپادى. ەسەسىنە, بيىلعى ماۋسىمدى ول جارقىن جەڭىسپەن باستادى. نيتستساداعى تۋرنيردە بارلىق قارسىلاسىن سىپىرا ۇتقان ەلميرا التىن مەدالدى موينىندا جارقىراتتى.
ءبىز وعان الداعى جارىستاردا دا ساتتىلىك تىلەيمىز. قازىرگى كەزدە وتاندىق بالۋاندار اراسىنان الەمدىك دەڭگەيدەگى دودالاردا جالعىز ءجاميلا باقبەرگەنوۆا عانا جۇلدە الىپ ءجۇر. ەندى ەلميرا دا سول بيىكتەن كورىنەدى دەپ ۇمىتتەنەمىز.