قازاقستاندا ينتەرنەت-جارناما جانە ونلاين پلاتفورمالار تۋرالى زاڭ جوباسى ازىرلەنەدى, دەپ حابارلايدى Egemen.kz اقدم ءباسپاسوز قىزمەتىنە سىلتەمە جاساپ.
بۇل جايىندا الماتىدا سايت جەتەكشىلەرى جانە بلوگەرلەرمەن كەزدەسكەن اقپارات جانە قوعامدىق دامۋ ءمينيسترى دارحان قىدىرالى ايتىپ بەردى.
«بۇل زاڭ جوباسى شەڭبەرىندە قولدانۋشىلاردىڭ جاۋاپكەرشىلىگى كۇشەيەدى. شەتەلدىك پلاتفورمالاردىڭ قىزمەتى قازاقستاندىق زاڭناماعا سايكەس رەتتەلەدى. الەۋمەتتىك جەلى يەلەرى ءوز ينتەرفەيسىن قازاقستاندىقتار ءۇشىن مەملەكەتتىك تىلدە ۇسىنۋعا مىندەتتەلەدى. اقپاراتقا قول جەتكىزۋ ماسەلەلەرى جونىندەگى زاڭعا تۇزەتۋلەر ازىرلەندى. ۇسىنىلعان وزگەرىستەر, ازاماتتاردىڭ اقپاراتقا قول جەتكىزۋ قۇقىعىن زاڭسىز شەكتەگەن مەملەكەتتىك ورگانداردىڭ جاۋاپكەرشىلىگىن كۇشەيتەدى», دەدى مينيستر. بۇعان قوسا, مينيستر قازىرگى ۋاقىتتا ءداستۇرلى باق-تىڭ باعىتى كونتسەپتۋالدى تۇرعىدا وزگەرىپ جاتقانىن, سوندىقتان مينيسترلىك مەديا زاڭنامانىڭ جاڭا جوباسى جۇرتشىلىق نازارىنا ۇسىنىلعانىن اتاپ ءوتىپ, ونى بەلسەندى تالقىلاۋعا شاقىردى.دارحان قىدىرالى اڭگىمە بارىسىندا ارىپتەستەرىنە جالعان اقپاراتتىڭ تارالماۋىنا مۇقيات بولۋدى, كونتەنت ساپاسىنا ءمان بەرۋدى سۇرادى.ەركىن فورماتتا وتكەن كەزدەسۋدە الماتىلىق كونتەنت جاساۋشىلار مينيسترگە ساۋالدارىن قويىپ, ءوز پىكىرلەرىن ورتاعا سالدى.