استانالىق ەمحانالاردا پيلوتتى رەجيمدە جەدەل مەديتسينالىق كومەك بولىمشەلەرى اشىلدى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
قالالىق №4, №5 جانە №10 ەمحانالاردا جەدەل مەديتسينالىق كومەك بولىمشەلەرى ىسكە قوسىلدى. نەگىزگى ماقسات – ستاتسيونارداعى دارىگەرلەر جۇكتەمەسىن ازايتۋ جانە شۇعىل العاشقى كومەك قولجەتىمدىلىگىن ارتتىرۋ.
ء«بىزدىڭ بولىمشە جۇمىس كۇندەرى ساعات 8:00-دەن كەشكى 18:00-گە دەيىن جۇمىس ىستەيدى. مۇندا تراۆماتولوگ پەن حيرۋرگ, تەراپەۆت دارىگەرلەر قابىلداۋ جۇرگىزەدى, شۇعىل قاجەت بولعان جاعدايدا ناۋقاستارعا ستاتسيوناردا كەزەك كۇتۋدىڭ قاجەتى جوق. فيلتر كابينەتتە جوعارى دەنە قىزۋى, مۇرىننان سۋ اعۋ سىندى ماۋسىمدىق جرۆي, وزگە دە ينفەكتسيا بەلگىلەرىمەن, ال قالعان ناۋقاستاردى شۇعىل العاشقى مەديتسينالىق كومەك ءبولىمى قابىلدايدى», دەيدى №10 قالالىق ەمحانانىڭ ءبولىم مەڭگەرۋشىسى ارمان الىبەكوۆ.
ايتا كەتەيىك, جەدەل جاردەم كومەگىنە جۇگىنەتىن ناۋقاستار دەنساۋلىق جاعدايىنا قاراي 4 ساناتقا بولىنەدى. ومىرگە جانە دەنساۋلىققا قاۋپى بار تىزىمگە العاشقى 3 كاتەگوريا جاتادى. ەندى 4-ساناتتاعى ناۋقاستار, ياعني ومىرىنە اسا قاۋىپ تونبەي, سوزىلمالى اۋرۋلارى اسقىنعان نەمەسە جەدەل وتكىر اۋرۋلارعا تاپ بولعان تۇرعىندار تىكەلەي ەمحاناعا بارىپ, مەديتسينالىق كومەك الا الادى.