2022 جىلى 7000 تاريحي قۇجات شەتەلدەن قازاقستانعا قايتارىلدى. بۇل تۋرالى بۇگىن مادەنيەت جانە سپورت مينيسترلىگىنىڭ القا وتىرىسىندا مينيستر اسحات ورالوۆ مالىمدەدى, دەپ حابارلايدى Egemen.kz.
قۇندى جادىگەرلەردە ەلىمىزدىڭ تاريحى تۋرالى اقپارات بار. ولارمەن قازىر تاريحشىلار مەن عالىمدار جۇمىس ىستەپ جاتىر. قۇجاتتار ۆەنگريا, گەرمانيا, يتاليا سياقتى ەۋرووداق ەلدەرىنەن اكەلىنگەن.
سونىمەن قاتار اسحات ورالوۆ وتكەن جىلى مادەنيەت جانە سپورت مينيسترلىگىنىڭ جۇيەلى جۇمىسىنىڭ ناتيجەسىندە 18 ارحەولوگيالىق زەرتتەۋ جۇرگىزىلىپ, ەلىمىزدىڭ ءتۇرلى وڭىرلەرىندە 30 ەسكەرتكىش قالپىنا كەلتىرىلگەنىن اتاپ ءوتتى. ولاردىڭ ىشىندە اتاپ ايتقاندا ازىرەت سۇلتان مۋزەي-قورىعى, وتىرار قالاشىعى, جاركەنت مەشىتى, بوتاي قونىسى, بوكەي ورداسى, احمەت بايتۇرسىن ۇلى مۇزەي-ءۇيى, بەكەت اتا جەر استى مەشىتى نىساندارى بار.
«مينيسترلىك شەتەلدەن اكەلىنگەن تاريحي قۇجاتتارداعى اقپاراتتىڭ عالىمداردىڭ زەرتتەۋلەرىنەن كەيىن جاريا بولۋى ءۇشىن جۇمىس جۇرگىزەتىن بولادى. بۇل كوزى قاراقتى وقىرماندارىمىزدىڭ ەلىمىزدىڭ تاريحى تۋرالى جاڭا ءبىلىم الۋى ءۇشىن وتە ماڭىزدى. سونىمەن قاتار مينيسترلىك ساپالى كىتاپتار شىعارۋعا ەرەكشە كوڭىل بولەدى. 2022 جىلى وڭىرلەرگە 506 مىڭ دانا كىتاپ جىبەرىلدى. بيىل بۇل باعىتتاعى جۇمىس كۇشەيتىلەدى. ءبىز ەلىمىزدىڭ كىتاپحانالارىن ساپالى ادەبيەتتەرمەن قامتاماسىز ەتەتىن بولامىز», دەدى مينيستر.