پرەمەر-مينيستر ءاليحان سمايىلوۆ تۇرىكتىڭ Alarko Holding كومپانياسىنىڭ پرەزيدەنتى يىلدىز ۋميت نۋريمەن كەزدەستى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
كەزدەسۋدە ەنەرگەتيكا, تەمىرجول جانە اۆتوجول قۇرىلىسى, سۋ تازارتۋ, قالدىقتاردى قايتا وڭدەۋ جانە ت. ب. سالالاردا جاڭا ينۆەستيتسيالىق جوبالاردى ىسكە اسىرۋ ماسەلەلەرى تالقىلاندى.
ۇكىمەت باسشىسى بىرقاتار ءىرى ينفراقۇرىلىمدىق جوبانى ىسكە اسىرۋعا قاتىسىپ جاتقان Alarko Holding-ءتىڭ جۇمىسى قازاقستان ءۇشىن ماڭىزدى ەكەنىن اتاپ كورسەتتى. قازىرگى ۋاقىتتا الماتى وبلىسىندا ۇلكەن الماتى اينالما اۆتوموبيل جولىن سالۋ جونىندەگى جوبا ءساتتى اياقتالىپ كەلەدى.
«مەنىڭ بىلۋىمشە, كومپانيا بوساعان بىلىكتى رەسۋرستى, تەحنيكا مەن جابدىقتار پاركىن قازاقستان اۋماعىندا باسقا دا جوبالاردى ىسكە اسىرۋ ءۇشىن پايدالانۋعا دايىن. ءبىز ىنتىماقتاستىعىمىزدىڭ كەلەشەگىن ەگجەي-تەگجەيلى تالقىلاۋعا دايىنبىز», دەدى ءاليحان سمايىلوۆ.
پرەمەر-مينيستر ەلىمىزدىڭ وزەكتى ينۆەستيتسيالىق پۋلىندا ەكونوميكانىڭ ءتۇرلى سالالارىنداعى 850-گە جۋىق پەرسپەكتيۆتى جوبا بار ەكەنىن ايتتى. ءوز تاراپىنان يىلدىز ۋميت نۋري اتالعان پۋلدى مۇقيات تالداۋعا, سونداي-اق يندۋستريا جانە ينفراقۇرىلىمدىق دامۋ مينيسترلىگىمەن الەۋەتتى جوبالاردىڭ تۇپكىلىكتى تىزبەسىن پىسىقتاۋعا دايىن ەكەندىگىن اتاپ ءوتتى. كەزدەسۋ قورىتىندىسى بويىنشا كەلىسسوزدى جاقىن ارادا جالعاستىرۋ تۋرالى ۋاعدالاستىققا قول جەتكىزىلدى.