اقش-تىڭ لەيك-پلەسيد قالاسىندا ءوتىپ جاتقان ححح قىسقى ۋنيۆەرسيادانىڭ كەزەكتى كۇنىندە قازاقستاننىڭ ستۋدەنت سپورتشىلارى تاعى ەكى مەدال جەڭىپ الدى. بۇل جولى بياتلونشىلارىمىز تۇعىرعا كوتەرىلدى.
اتالعان سپورت ءتۇرىنىڭ 10 شاقىرىمدىق سپرينت باسەكەسىندە الدىنا جان سالماعان جەرلەسىمىز بەكەنتاي تۇرلىبەكوۆ مارە سىزىعىن ءبىرىنشى كەسىپ, ۋنيۆەرسيادا جەڭىمپازى اتاندى. تۇرلىبەكوۆتەن تۇپ-تۋرا 22,2 سەكۋندقا قالىپ قويعان تاعى ءبىر وتانداسىمىز الەكساندر مۋحين قولا جۇلدەگە قول جەتكىزدى. ەكى سپورتشىمىزدىڭ ورتاسىنا امەريكالىق بياتلونشى بورن ۆەستەرۆەلت تۇسپەگەندە, بۇل جارىستا ءۇش بىردەي جەرلەسىمىزدى جەڭىس تۇعىرىنان كورۋىمىز ابدەن مۇمكىن ەدى. ويتكەنى كيريلل باۋەر مەن 15 شاقىرىمعا جارىستا توپ جارعان ۆاديم كۋرالەس مارە سىزىعىن الەكساندر مۋحيننەن كەيىن كەسىپ, سايكەسىنشە 4-5-ورىندارعا جايعاستى.
جارىس جەڭىمپازى اتانعان بەكەنتاي تۇرلىبەكوۆ اتالعان قاشىقتىقتى 27 مينۋت 51.5 سەكۋندتا ەڭسەرىپ, 41 بياتلونشىنىڭ ىشىندە وق اتۋ ايماعىندا بىردە-ءبىر رەت قاتەلەسپەگەن جالعىز سپورتشى اتاندى. كۇمىس جۇلدەنى موينىنا ىلگەن بورن ۆەستەرۆەلت وق اتۋدا ەكى رەت قاتەلەسسە دە, جىلدامدىعىنىڭ ارقاسىندا ەكىنشى ورىنعا تابان تىرەدى. الەكساندر مۋحين دە وق اتۋ ايماعىندا ەكى رەت ءمۇلت كەتىپ, مارەگە ءۇشىنشى بولىپ جەتتى.
ەندى جەرلەستەرىمىز بۇگىن ءىز قۋ باسەكەسىندە باق سىنايدى. بۇل جارىس قازاقستان بياتلونشىلارىنا جەڭىلدەۋ بولادى. ويتكەنى ولار سورەدەن كەشەگى ۋاقىت كورسەتكىشتەرى بويىنشا شىعادى. ەگەر, وتانداستارىمىز اتۋ ايماعىندا نىسانا كوزدەۋدەن ءمۇلت كەتپەسە, بۇل جولى دا جۇلدەگەرلەر قاتارىنان كورىنۋگە زور مۇمكىندىك تۋىپ تۇر.
ال قاتارىنان ءتورت تۋردا قارسىلاس شىداتپاعان شايبالى حوككەيدەن قازاقستان ستۋدەنتتەر قۇراماسى بەسىنشى ويىندا اقش حوككەيشىلەرىنە ەسە جىبەردى. بۇل كەزدەسۋدە ايدىن يەلەرىنە جەڭىس اۋاداي قاجەت ەدى. سەبەبى ولار وتكەن تۋردا سلوۆاكيادان 5:2 ەسەبىمەن جەڭىلىپ, تۋرنير كەستەسىندە ءۇشىنشى ورىنعا ءتۇسىپ قالعان بولاتىن. سوندىقتان اقش قۇراماسى پلەي-وفف كەزەڭىنە شىعۋ ءۇشىن قازاقستان حوككەيشىلەرىن ويىننىڭ نەگىزگى كەزەڭىندە جەڭۋگە ءتيىس ەدى.
كەزدەسۋدىڭ ەسەبىن ءبىرىنشى مينۋتتا ايدىن يەلەرىنەن حانيۋولل مەتتيۋ اشقانىمەن, ارادا ءتورت مينۋت وتكەندە باتىرلان مۇراتوۆ تارازى باسىن تەڭەستىرىپ, مۇزايدىنعا جينالعان جەرگىلىكتى جانكۇيەرلەردىڭ كوڭىلىن سۋ سەپكەندەي باسىپ تاستادى. بىراق ەكىنشى كەزەڭدە اقش حوككەيشىلەرى اندرەي شۋتوۆ قورعاعان قاقپاعا قاتارىنان ءۇش شايبا سوعىپ, 4:1 ەسەبىمەن جەڭىسكە جەتتى. وسىلايشا, ۆ توبىندا العاشقى ەكى ورىنعا يە بولعان قازاقستان جانە اقش قۇرامالارى پلەي-وفف ساتىسىنا جولداما الدى.
مەدال كورسەتكىشى بويىنشا قازاقستان دەلەگاتسياسى 3 التىن جانە 1 قولا جۇلدەمەن جالپىكوماندالىق ەسەپتە 6-ورىندا كەلە جاتىر. العاشقى ءۇش ورىندى جاپونيا (11 التىن, 11 كۇمىس, 5 قولا), پولشا (4 التىن, 3 كۇمىس, 3 قولا) جانە كورەيا (3 التىن, 3 كۇمىس, 2 قولا) سپورتشىلارى يەلەنىپ تۇر.