14 قاڭتار كۇنى قىزىلوردا قالالىق پوليتسيا باسقارماسىنا ءىرى ساۋدا ءۇيىنىڭ يەسى ارىزداندى, دەپ حابارلايدى Egemen.kz.
ارىز بويىنشا تەكسەرۋ جۇرگىزگەن پوليتسەيلەر وتكەن جىلدىڭ قاراشا ايىندا بەلگىسىز ادامنىڭ WhatsApp جەلىسى ارقىلى ونلاين تۇردە ساۋدا ۇيىنە 514 مىڭ تەڭگەگە ايەلدەرلىڭ سىرت كيىمدەرىنە تاپسىرىس بەرىپ, تاۋاردى تاكسي ارقىلى العانىن انىقتايدى. ودان كەيىن دە باسقا ابونەنتتىك نومەر ارقىلى تاپسىرىستى قابىلداۋشىعا بىرنەشە جالعان تۇبىرتەك جىبەرىپ, يندرايۆەر ارقىلى شىمكەنت قالاسىنا زاتتارىن سالدىرتىپ وتىرعان.
تاپسىرىستى قابىلداۋشى ساتىپ الۋشى ايەلدىڭ اۋدارىمى ەسەپشوتىنا تۇسپەگەندىكتەن دەرەۋ قىزىلوردا قالاسى پوليتسيا باسقارماسىنا كەلىپ, كومەك سۇراعان.
اتالعان وقيعا بويىنشا قىلمىستى اشۋ بارىسىندا باسقارما قىزمەتكەرلەرى شىمكەنت قالاسىنا بارىپ, كۇدىكتىنى ۇستادى. وتىز ءتورت جاستاعى ايەل «فەيكوۆىە چەكي» قوسىمشاسىن قولدانىپ, جالعان تۇبىرتەك ارقىلى جابىرلەنۋشىگە 7 ميلليون 500 مىڭ تەڭگە سوماسىندا زالال كەلتىرگەنىن مويىندادى.
اتالعان دەرەك بويىنشا قر قك 190-بابىنىڭ 2-بولىگى 4 – تارماعىمەن (الاياقتىق) سوتقا دەيىنگى تەرگەپ-تەكسەرۋ ارەكەتتەرى جۇرگىزىلىپ جاتىر. كۇدىكتى قىزىلوردا قالالىق پوليتسيا باسقارماسىنىڭ ۋاقىتشا ۇستاۋ يزولياتورىنا قامالدى.