كەشە تايلاند استاناسى – بانگكوكتە بوكستان 22 جاسقا دەيىنگى جاستار اراسىندا ازيا چەمپيوناتىنىڭ شىمىلدىعى ءتۇرىلدى. بيىلعى دوداعا قازاقستاننان بولەك, قىرعىزستان, تايلاند, مالايزيا, وزبەكستان, تاجىكستان, كامبودجا, كۋۆەيت بوكسشىلارى قاتىسىپ جاتىر.
جارىستىڭ العاشقى كۇنىندە قازاقستان قۇراماسىنىڭ ەكى بوكسشىسى شارشى الاڭعا كوتەرىلىپ, ەكەۋى دە سارى قۇرلىق باسەكەسىن جەڭىسپەن باستادى. ءبىرىنشى بولىپ رينگكە شىققان 48 كيلوداعى ەل چەمپيونى, جاستار اراسىنداعى الەم چەمپيونى, ەرەسەكتەر اراسىنداعى ازيا بىرىنشىلىگىنىڭ جەڭىمپازى سانجار تاشكەنباي قىرعىزستان بوكسشىسى انۋار حودجيەۆپەن قولعاپ ءتۇيىستىرىپ, تورەشىلەردىڭ ءبىراۋىز شەشىمىمەن جەڭىسكە جەتتى.
سانجاردىڭ ءىزىن الا قازاقستان جانكۇيەرلەرى 57 كيلو سالماقتاعى ماحمۇد سابىرحاننىڭ ونەرىن تاماشالادى. بۇعان دەيىن 54 كيلودا الەم چەمپيوناتىنىڭ (2021) جانە ازيا بىرىنشىلىگىنىڭ (2022) كۇمىس جۇلدەسىن يەلەنگەن وتانداسىمىز جاستار اراسىنداعى بيىلعى دودادا جاڭا سالماقتا باق سىناپ جاتىر. ماحمۇد العاشقى اينالىمدا وزبەكستان وكىلى ميرزابەك ميرزاحاليلوۆپەن جۇدىرىقتاسىپ, 5:0 ەسەبىمەن بەت قاراتپاي جەڭدى.
ايتا كەتەيىك, جەرەبە قورىتىندىسى بويىنشا, جاستار اراسىنداعى ازيا بىرىنشىلىگىن ءۇش بوكسشىمىز (سەرىك ابزال (67 كگ), ەرحات بەكزات (92 كگ), امانات سابىرعالي (+92 كگ) جارتىلاي فينالدان باستايدى. بۇل – قۇراما قورجىنىندا كەم دەگەندە 3 قولا جۇلدە بار دەگەن ءسوز.