2022 جىلدىڭ قورىتىندىسى بويىنشا قولعا الىنعان جوبالاردىڭ ناتيجەسىندە قالالىق ەلدى مەكەندەردە سۋمەن جابدىقتاۋ قىزمەتتەرىنە قولجەتىمدىلىك 98,4%-عا جانە اۋىلدى جەرلەردە 94,5%-عا دەيىن ۇلعايتىلدى, دەپ حابارلايدى Egemen.kz يدم ءباسپاسوز قىزمەتىنە سىلتەمە جاساپ.
بۇل تۋرالى پرەمەر-مينيستر ءاليحان سمايىلوۆتىڭ قاتىسۋىمەن وتكەن يندۋستريا جانە ينفراقۇرىلىمدىق دامۋ مينيسترلىگىنىڭ كەڭەيتىلگەن القا وتىرىسىندا ۆيتسە-مينيستر ەركەبۇلان داۋىلباەۆ ايتتى.
قازىر بارلىق قالا مەن اۋىلدىق جەردى تازا سۋمەن 100% قامتاماسىز ەتۋ ءۇشىن ء«ار ەلدى مەكەندە تازا سۋ» ۇلتتىق جوباسى ازىرلەنىپ جاتقانى بەلگىلى بولدى.
«وسى جىلى قالا حالقىنىڭ 98,7%-ىن جانە اۋىل حالقىنىڭ 96%-ىن سۋمەن جابدىقتاۋ قىزمەتتەرىمەن قامتۋ جوسپارلانىپ وتىر. بۇل باعىتتاعى جوبالاردى قارجىلاندىرۋ ءۇشىن رەسپۋبليكالىق بيۋدجەتتەن شامامەن 172 ملرد تەڭگە كولەمىندە اقشا قاراستىرىلىپ وتىر», دەدى ءمينيستردىڭ ورىنباسارى.
جەرگىلىكتى اتقارۋشى ورگانداردىڭ سوڭعى دەرەكتەرىنە سايكەس ءار ءتۇرلى قارجىلاندىرۋ كوزدەرى ەسەبىنەن شامامەن 3 مىڭ شاقىرىمداي جەلىگە جاڭعىرتۋ جۇمىستارى جۇرگىزىلگەن. تۇتاستاي العاندا, بىلتىر جەلىلەردىڭ جالپى توزۋى 51% دەڭگەيىندە بايقالدى. پرەزيدەنت قاسىم-جومارت توقاەۆتىڭ سايلاۋالدى باعدارلاماسىنا سايكەس 2023 جىلى بۇل كورسەتكىشتى 50%-عا دەيىن تومەندەتۋ كوزدەلگەن.
وسى ورايدا ەلىمىزدەگى كارىز-تازارتۋ جۇيەلەرىنىڭ قالىپتى جۇمىس ىستەۋ ماسەلەلەرى دە يدم-ءنىڭ ۇدايى باقىلاۋىندا ەكەنىن اتاپ وتكەن ءجون. ايتالىق, قازىر رەسپۋبليكاداعى 89 قالانىڭ 27-دە كارىز-تازارتۋ قۇرىلىمدارى قاراستىرىلماعان. ال 41 قالادا ءتيىستى نىسانداردىڭ توزۋى 60%-دان استام. وسىعان بايلانىستى اتالعان نىسانداردى جاڭعىرتىپ, جوندەۋ ءۇشىن قارجىلاندىرۋ مەحانيزمدەرى دە ازىرلەنگەنىن ايتا كەتەيىك.