قۇرلىقتىق حوككەي ليگاسىندا (قحل) باق سىنايتىن ەلوردانىڭ «بارىسى» بيىلعى ماۋسىمدى وتە ءساتسىز وتكىزىپ جاتىر. قازىرگى تاڭدا اندرەي سكابەلكا شاكىرتتەرى «شىعىس» كونفەرەنتسياسىنىڭ جارىس كەستەسىندە 48 ۇپايمەن 11 كوماندانىڭ ىشىندە نەبارى 10-ورىندا كەلەدى. كوش سوڭىندا تۇرعان «امۋردىڭ» دا ەنشىسىندە 48 ۇپاي بار. ەگەر, جەرلەستەرىمىز ەندى قالعان 16 تۋردا دا ەڭسە تىكتەمەسە, تۋرنير كەستەسىندە جوعارى ورىننان كورىنۋى بىلاي تۇرسىن, گاگارين كۋبوگى جولىنداعى جارىسقا جولداما بەرەتىن ۇزدىك 8 كلۋبتىڭ قاتارىنا ىلىنە الماي قالۋى ابدەن مۇمكىن.
جاڭا ماۋسىمنىڭ الدىندا «بارىستى» بۇعان دەيىن ەكى جىل جاتتىقتىرعان, سول ارالىقتا كلۋبپەن بىرگە تولايىم تابىستارعا قول جەتكىزگەن بەلارۋس مامانى اندرەي سكابەلكا كوماندا تىزگىنىن ۇستاعاندا, جانكۇيەرلەردىڭ قۋانىشىندا شەك بولعان جوق. بارلىعى دا قازاقستان كومانداسىنىڭ بيىلعى تۇراقتى بىرىنشىلىكتە ءتاۋىر ونەر كورسەتەتىنىنە سەنىمدى بولعان ەدى. سەبەبى اندرەي ۆلاديميروۆيچ «بارىس» تىزگىنىن ۇستاعان العاشقى ماۋسىمىندا-اق (2018/19) ەلوردا ۇجىمىنىڭ قحل-دا بۇرىن-سوڭدى كورسەتپەگەن ناتيجەسىن تىركەدى. ياعني قۇرلىقتىق حوككەي ليگاسىنىڭ تاريحىندا ءبىر ماۋسىمدا جيناعان ۇپاي سانى بويىنشا رەكورد ورناتتى. 62 ويىندا 86 ۇپاي جينادى. سونىمەن قاتار سكابەلكانىڭ باسشىلىعىمەن وتكەن ەكى ماۋسىمدا «بارىس» ويىنشىلارى چەرنىشەۆ ديۆيزيونىندا قاتارىنان ەكى جىل توپ باستاپ, ەكى مارتە گاگارين كۋبوگى جولىنداعى جارىستىڭ جارتىلاي فينالىنا دەيىن جەتتى.
وسىنداي تابىستى ناتيجەلەردەن كەيىن «بارىس» جانكۇيەرلەرى بەلارۋس مامانىنىڭ قازاقستانعا ەكىنشى رەت ورالۋى دا جەمىستى بولادى دەپ سەنگەن ەدى. وكىنىشكە قاراي, «بارىس» حوككەيشىلەرى بيىلعى ماۋسىمدا جانكۇيەرلەرىنىڭ سەنىمىن اقتاي الماي وتىر.
جالپى, «بارىستىڭ» بيىلعى ماۋسىمداعى ساتسىزدىگىنە ماماندار ءارتۇرلى بولجام ايتىپ جاتىر. كوبىسى قازاقستان كومانداسىنىڭ باسشىلىعى ماۋسىمارالىق ءۇزىلىس كەزىندە ترانسفەر ساياساتىن دۇرىس جۇرگىزبەدى دەپ ەسەپتەيدى. ارينە, بۇل پىكىردىڭ دە جانى بار. جاز مەزگىلىندە كوماندادان تاجىريبەلى حوككەيشىلەردىڭ ءبىر شوعىرى كەتتى. ماسەلەن, كەيىنگى بەس جىلىن «بارىستا» وتكىزگەن قورعاۋشى ۆالەري ورەحوۆ ماگنيتوگورسكىنىڭ «مەتاللۋرگىنە» اۋىسسا, ەلوردالىق كلۋبتا تابانى كۇرەكتەي 14 ماۋسىم ويناعان رومان ستارچەنكو ءوز كۇشىن باسقا كلۋبتا سىناپ كورۋگە بەل بۋدى.
ورەحوۆ قحل-دا 211 ماتچ وتكىزىپ, 32 (8+24) ۇپاي جينادى. ال قازاقستان قۇراماسىنىڭ كاپيتانى ستارچەنكو 740 ماتچتا 200 شايبا سوعىپ, 377 مارتە ارىپتەستەرىنە ناتيجەلى پاس بەرگەن. سونداي-اق رومان ستارچەنكو – «بارىس» تاريحىنداعى ەڭ ۇزدىك ەكى سۇرمەرگەنىنىڭ ءبىرى. مىنە, «بارىس» باسشىلىعى كوماندانىڭ كوشباسشىسىنا, ناعىز بەت-بەينەسىنە اينالعان وسىنداي حوككەيشىلەردى وپ-وڭاي وزگە كلۋبتارعا جىبەرە سالعان.
ال ولاردىڭ ورنىنا 33 جاستاعى شاۋ تارتقان كانادالىق قورعاۋشى الەكس گرانت, 28 جاستاعى دجەسسي گرەم مەن 26 جاستاعى نەلسون نوجە, قحل كوماندالارىندا جارىتىپ ويناماعان رەسەيلىك حوككەيشىلەر – يۋري سەرگيەنكو, ميحايل گريگورەۆ, يۆان ميششەنكو سەكىلدى ويىنشىلاردى الدىرتتى. سونداي-اق شابۋىلشىلاردان اقش-تىڭ تەك تومەنگى ليگالارىندا ويناعان دجەرەمي براككو مەن ەنتوني ءلۋيستى اتتاي قالاپ الدىرتتى.
اتالعان حوككەيشىلەردىڭ وسى ماۋسىمداعى ستاتيستيكاسىنا كوز جۇگىرتسەك, كىمنىڭ قاي دەڭگەيدە ويناپ جاتقانىن وڭاي اڭعارامىز. ماسەلەن, الەكس گرانت بيىل نەبارى 18 ماتچتا مۇزايدىنعا شىعىپ, بەس مارتە مەرگەندىك تانىتسا, دجەسسي گرەم بارلىعى 50 ويىنعا قاتىسىپ, بىردە-ءبىر شايبا سوقپاعان. نەلسون نوجە 36 كەزدەسۋدە ءبىر-اق رەت دالدىك تانىتقان ەكەن. يۋري سەرگيەنكو, ميحايل گريگورەۆ پەن يۆان ميششەنكولار دا ءبىر رەتتەن كوزگە تۇسكەننەن باسقا ەشتەڭە بىتىرمەگەن. شابۋىلشىلار دجەرەمي براككو مەن ەنتوني لۋيس 46 جانە 47 ماتچتا 10 شايبانى ارەڭ قاقپاعا ەنگىزگەن.