«AMANAT» پارتياسىنىڭ جاستار قاناتى «جاستارعا كەڭەس» جوباسىن ىسكە قوستى. ونىڭ اياسىندا ءموبيلدى كەڭەس بەرۋ پۋنكتتەرى بازارلاردا, ساۋدا ۇيلەرىندە, اۋىلدار مەن مونوقالالاردا تۇراقتى نەگىزدە جۇمىس ىستەيدى, دەپ حابارلايدى Egemen.kz.
كەڭەس بەرۋ جۇمىسىنا «جاستار رۋحىنىڭ» قىزمەتكەرلەرى, حالىقتى جۇمىسپەن قامتۋ ورتالىقتارىنىڭ, «وتباسى بانك» اق-نىڭ, حالىققا قىزمەت كورسەتۋ ورتالىقتارىنىڭ, مەديتسينالىق ساقتاندىرۋ قورىنىڭ, «دامۋ» كاسىپكەرلىكتى دامىتۋ قورىنىڭ, وڭىرلىك ءبىلىم باسقارمالارىنىڭ جانە «اتامەكەن» ۇلتتىق كاسىپكەرلەر پالاتاسىنىڭ ماماندارى اتسالىسادى.
«جاستار رۋحى» جق توراعاسى نۇرجان جەتپىسباەۆ جاستاردى تولعاندىرعان ماسەلەلەردى شەشۋگە باعىتتالعان جوبا تۇراقتى تۇردە جۇمىس ىستەيتىنىن اتاپ ءوتتى.
«مۇنداي كەڭەس بەرۋ جۇمىستارى ەلىمىزدىڭ بارلىق وڭىرىندە قولعا الىنادى. جوبا بارىنە بىردەي قولجەتىمدى بولۋى ءۇشىن ماماندار تەك قالالاردا عانا ەمەس, سونىمەن قاتار اۋىلدىق جەرلەردە دە جاستارعا كەڭەس بەرەدى. ەڭ باستىسى, بۇل ءىس-شارا اپتاسىنا ەكى رەت تۇراقتى تۇردە وتكىزىلەدى», دەدى ول.
ەلورداداعى «استانالىق» بازارىندا جۇمىس ىستەيتىن مارلەن سارداروۆ ەسىمدى ازامات بۇل جوبا جونىندە جارنامادان بىلگەنىن ايتادى.
«بازار قىزمەتكەرلەرىنىڭ جۇمىس كەستەسى تۇراقسىز. ولار تاڭعى 6-دان كەشكى 9-10-عا دەيىن جۇمىس ىستەيدى. سوندىقتان بانك, ەمحانا سىندى جەرلەرگە بارۋعا ۋاقىت تابىلا بەرمەيدى. مەديتسينالىق ساقتاندىرۋ ماسەلەسى بويىنشا سۇراعىم بار ەدى. سول بويىنشا ەگجەي-تەگجەيلى اقپارات الا العانىما قۋانىشتىمىن», دەدى ول.
وسىنداي جۇمىس شىمكەنتتە دە جۇرگىزىلدى. جەرگىلىكتى تۇرعىن ەرىك رۇستەمنىڭ ايتۋىنشا, «جاستارعا كەڭەس» جوباسى ارقىلى تۇرعىن ءۇي باعدارلامالارى تۋرالى اقپارات الۋ وتە ىڭعايلى.
«الەۋمەتتىك جەلىدەگى نەمەسە تەلەديدارداعى حابارلاندىرۋلاردى ءبارى بىردەي كورە بەرمەيدى. الايدا بازاردا نەمەسە وزگە دە قوعامدىق ورىنداردا تۇرعىندار بانك وكىلدەرىنەن, شەنەۋنىكتەردەن وزدەرىن تولعاندىرعان ساۋالدارعا بەتپە-بەت جاۋاپ الا الادى», دەدى ول.
پەتروپاۆلدا م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ ستۋدەنتتەرى دە جوباعا قىزىعۋشىلىق تانىتتى.
«جاستار ءوز ءىسىن باستاۋ ءۇشىن نەسيە رەسىمدەۋ, ونى دۇرىس تىركەۋ, سالىقتىق جەڭىلدىكتەر تۋرالى جىلدام انىقتاما الا الادى. ياعني, تەك سالا مامانىنان الۋعا بولاتىن جاۋاپتار بەرىلەدى», دەيدى ستۋدەنت بەكزات لاتىپوۆا.
كەڭەس بەرۋ ءىس-شارالارىنىڭ كەستەسىمەن «جاستار رۋحىنىڭ» الەۋمەتتىك جەلىلەردەگى رەسمي پاراقشالارىنان تانىسۋعا بولادى.