پرەمەر-مينيستر ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا الەۋمەتتىك جانە ينجەنەرلىك ينفراقۇرىلىمدى جاڭعىرتۋ ارقاسىندا اۋىلداعى ءومىر ءسۇرۋ ساپاسىن جاقسارتۋ بويىنشا «اۋىل – ەل بەسىگى» جوباسىن ىسكە اسىرۋ بارىسى قارالدى, دەپ حابارلايدى Egemen.kz primeminister.kz-كە سىلتەمە جاساپ.
ۇلتتىق ەكونوميكا ءمينيسترى الىبەك قۋانتىروۆ رەسپۋبليكادا 6 293 اۋىلدىق ەلدى مەكەن بارىن, وندا 7,8 ملن ادام تۇراتىنىن باياندادى. ولاردىڭ قاتارىنان دامۋ الەۋەتى جوعارى 3,5 مىڭ اۋىل ىرىكتەلدى (بارلىق اۋىل تۇرعىندارىنىڭ 90%-ى). ولاردى جاڭعىرتۋ «اۋىل – ەل بەسىگى» جوباسى اياسىندا باسىم تارتىپپەن جۇزەگە اسىرىلادى.
ماسەلەن, 2019-2022 جىلدارى 326 ملرد تەڭگەگە 3,7 مىڭ جوبا ىسكە اسىرىلدى. بۇل تۇرعىن ءۇي-كوممۋنالدىق شارۋاشىلىق سالاسىنداعى 334 وبەكتىنى, 1,2 مىڭ الەۋمەتتىك ينفراقۇرىلىم وبەكتىسىن ء(بىلىم بەرۋ, دەنساۋلىق ساقتاۋ, سپورت) جانە 2 مىڭنان استام كولىك ينفراقۇرىلىمى وبەكتىسىن (اۋىل ىشىندەگى جولدار) سالۋعا جانە جوندەۋگە مۇمكىندىك بەردى.
بيىل 736 اۋىلدا 143 ملرد تەڭگەگە تاعى 1,5 مىڭ جوبانى ىسكە اسىرۋ جوسپارلانعان: 119 جوبا تكش سالاسىندا, 275 جوبا الەۋمەتتىك ينفراقۇرىلىم بولىگىندە, سونداي-اق 1,1 مىڭ جوبا اۋىل ىشىندەگى جولداردىڭ جاعدايىن جاقسارتۋ بويىنشا ىسكە اسىرىلماق.
وڭىرلەردە «اۋىل – ەل بەسىگى» جوباسىن ىسكە اسىرۋ تۋرالى تۇركىستان وبلىسىنىڭ اكىمى دارحان ساتىبالدى, ۇلىتاۋ وبلىسىنىڭ اكىمى بەرىك ابدىعالي ۇلى جانە باتىس قازاقستان وبلىسىنىڭ اكىمى ناريمان تورەعاليەۆ باياندادى.
پرەمەر-مينيستر 2027 جىلعا قاراي الەۋەتى جوعارى 3,5 مىڭ اۋىلدىڭ ءبارىن وڭىرلىك ستاندارتتار جۇيەسىنە ساي دامىتۋ جوسپارلانىپ وتىرعانىن اتاپ ءوتتى.
«وعان سايكەس اۋىلداردا ساپالى جولدار مەن مادەنيەت, سپورت جانە دەنساۋلىق ساقتاۋ وبەكتىلەرى, مەكتەپتەر مىندەتتى تۇردە بولۋى ءتيىس, سونداي-اق اۋىل ينفراقۇرىلىمىن دامىتۋعا باسا ءمان بەرىلەدى. ءبىزدىڭ باستى ماقساتىمىز – اۋىلداعى ءومىر ساپاسىن جاقسارتۋ. قازىردىڭ وزىندە ناقتى ناتيجەلەر بار», دەدى ءاليحان سمايىلوۆ.
ۇكىمەت باسشىسى اتىراۋ, قوستاناي, سولتۇستىك قازاقستان, تۇركىستان وبلىستارىندا جوبالاردى پايدالانۋعا بەرۋ قارقىنى جاقسى ەكەنىن اتاپ ءوتتى. بۇل ورايدا ۇلىتاۋ جانە باتىس قازاقستان وبلىستارى وسى كورسەتكىش بويىنشا ارتتا قالىپ وتىر.
«اتالعان وڭىرلەردىڭ اكىمدەرى بۇعان ەرەكشە نازار اۋدارۋى قاجەت. سونىمەن قاتار ىسكە اسىرۋ مەرزىمدەرى بويىنشا ارتتا قالۋعا جول بەرمەۋ كەرەك», دەدى ءاليحان سمايىلوۆ.
پرەمەر-مينيستر بارلىق جوسپارلاردى جۇزەگە اسىرۋ 40 مىڭعا جۋىق جۇمىس ورنىن قۇرۋعا مۇمكىندىك بەرىپ, اۋىلدىق اۋماقتاردى دامىتۋعا جاڭا سەرپىن بەرەتىنىن ايتتى.
«2027 جىلعا قاراي اۋىلدىق ەلدى مەكەندەردە سۋدىڭ ساپاسى مەن جولداردىڭ جاعدايى جاقسارادى, ينجەنەرلىك جەلىلەر جوندەلىپ, الەۋمەتتىك, مادەنيەت جانە سپورت وبەكتىلەرى سالىنادى», دەدى ءاليحان سمايىلوۆ.
ءسوز سوڭىندا ۇكىمەت باسىشىسى ۇلتتىق ەكونوميكا مينيسترلىگى اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسىن ازىرلەۋ بارىسىندا بولاشاعى بار اۋىلداردى ايقىنداۋ ادىستەرىن وزەكتەندىرىپ, وڭىرلىك ستاندارتتار جۇيەسىن جەتىلدىرۋ جونىندەگى جاڭا تاسىلدەردى ەسكەرۋى قاجەت ەكەنىن اتاپ ءوتتى.