فۋتزالدان قازاقستان چەمپيوناتىنىڭ كەزەكتى تۋر ويىندارى ءوز مارەسىنە جەتتى. بۇل تۋردىڭ باستى سەنساتسياسىن ورالدىڭ «بايتەرەك» كومانداسى جاسادى.
تۋرنير كەستەسىنىڭ بەل ورتاسىندا كەلە جاتقان ورالدىڭ «بايتەرەگى» بىلتىرعى قازاقستان بىرىنشىلىگىنىڭ كۇمىس جۇلدەگەرى, چەمپيوندار ليگاسىندا ونەر كورسەتىپ جۇرگەن رۋدنىيدىڭ «ايات» كلۋبىن العاشقى ويىندا 5:4 ەسەبىمەن جەڭىپ, كىشىگىرىم سەنساتسيا جاساعان ەدى. دەگەنمەن ەرتەڭىنە وتكەن قارىمتا ماتچتا «ايات» قارسىلاستارىنان ەسە قايتاردى – 4:0. ال ەل چەمپيونى – «قايرات» ەكى ماتچتا دا «ورداباسىنى» 9:1, 9:0 ەسەبىمەن ءسۇرىندىردى.
22-23-تۋر ماتچتارىنان كەيىن الماتىنىڭ «قايراتى» 54 ۇپايمەن تۋرنير كەستەسىندە كوش باستاپ تۇر. ەكىنشى ورىنداعى «اياتتىڭ» ەنشىسىندە 20 ماتچتان كەيىن 46 ۇپايى بار. كەيىنگى ورىندارعا «راحمەت» (32 ۇپاي), «اقتوبە» (29), «اتىراۋ» (28), «بايتەرەك» (24), «ورداباسى» (20), «استانا» (19), «كاسپي» (19) جانە «جەتىسۋ» (8) جايعاسقان.