جىلدىڭ باسى ءار شىعارماشىلىق ۇجىم ءۇشىن تىڭ جوبالار مەن جاڭالىقتاردىڭ جارقىن باستاۋى ىسپەتتەس. ەل استاناسىنىڭ مادەني وشاعى «استانا وپەرا» تەاترىندا دا وسى ماۋسىم بىرقاتار پرەمەراعا تولى بولدى. ماسەلەن, دج.ءپۋچچينيدىڭ «بوگەما», ە.برۋسيلوۆسكيدىڭ «قىز جىبەك» وپەرالارى, ر.رەبەكتىڭ حورەوگرافياسىندا س.پروكوفەۆتىڭ «كۇلبيكە» قيال-عاجايىپ بالەتى, ا.اداننىڭ شىتىرمان وقيعالى «كورسار» بالەتى مەن كۇلاش بايسەيىتوۆا اتىنداعى كامەرالىق زالداعى كونتسەرتتەر تەاتر رەپەرتۋارىنا ەرەكشە سەرپىن بەردى. ودان بولەك بيىلعى مەرەيتويلىق ماۋسىمعا وراي گاسترولدىك ساپارلار, «جىبەك جولى» حالىقارالىق وپەرا جانە بالەت فەستيۆالى مەن Umai تۇڭعىش ۇلتتىق سىيلىعى تەاتر تاريحىنداعى ايتۋلى وقيعالار تىزبەگىندە قالدى.
جاڭا جىلدىڭ جوسپارىنداعى شىعارماشىلىق جاڭالىقتار دا از ەمەس. «استانا وپەرا» تەاترىنىڭ ديرەكتورى عالىم احمەدياروۆ ونەر ورداسىنىڭ رەپەرتۋارىنداعى الداعى وزگەرىستەرمەن بولىسە وتىرىپ, مەرەيتويلىق ماۋسىمدا ايگىلى ورىنداۋشىلار مەن سپەكتاكلدەردى بەزەندىرۋگە شەتەلدىڭ مىقتى ماماندارىن ارنايى شاقىراتىنىن ايتتى.
«تەاتر ءۇشىن مەرەيتويلىق جىل ۆ.ا.موتسارتتىڭ مۋزىكاسىنا چەح حورەوگرافى يرجي كيلياننىڭ «كىشكەنتاي ءولىم» بالەتىنىڭ پرەمەراسىمەن جالعاسادى دەپ جوسپارلاپ وتىرمىز. سونداي-اق كومپوزيتور گەرمان لەۆەنسكولدتىڭ «سيلفيدا» بالەتىنىڭ قويىلىمىنا دايىندىق ءجۇرىپ جاتىر. ودان بولەك شەتەلدىك ارىپتەستەرمەن بىرلەسكەن حالىقارالىق جوبالار ازىرلەدىك. تانىمال ۇجىمداردىڭ ءبىزدىڭ ساحنادا گاسترولدىك ونەر كورسەتۋلەرى دە جوسپارلانىپ وتىر. ماسەلەن, بوريس ەيفماننىڭ بالەت تەاترى كەلىپ, «اننا كارەنينا» مەن «پيگماليون ەففەكتىسى» سپەكتاكلدەرىن ۇسىنادى», دەدى تەاتر ديرەكتورى.
اتالعان ونەر ۇجىمى بالالارعا ارنالعان شىعارمالاردى دا قامتىپ كەلەدى. بىرنەشە اي بۇرىن س.پروكوفەۆتىڭ مۋزىكاسىنا «كۇلبيكە» بالەتىنىڭ پرەمەراسى وتكەن ەدى. جاقىندا جولان داستەنوۆتىڭ «قاڭباق شال» ەرتەگى-وپەراسى رەپەرتۋارعا ەنگىزىلمەك.
«بۇدان بولەك كۇزگە قاراي «وپەراليا» حالىقارالىق مۋزىكالىق فەستيۆالىن وتكىزەمىز. ايتا كەتەيىك, بۇل فەستيۆالدىڭ ۇيىمداستىرىلىپ جۇرگەنىنە دە جيىرما جىلدان استى, ونىڭ تاريحى كۇلاش بايسەيىتوۆا اتىنداعى وپەرا جانە بالەت تەاترىنان باستالادى. ەكى ونجىلدىقتان استام ۋاقىت بويى وعان الەمدىك وپەرا مەن بالەت ساحناسىنىڭ جۇلدىزدارى قاتىستى. وسى فەستيۆال اياسىندا بالالارعا ارنالعان سپەكتاكلدەر دە كورسەتىلەدى», دەيدى ع.احمەدياروۆ.
ءيا, تەاتر رەپەرتۋارى ءار جىل سايىن تولىعىپ, جاڭارىپ وتىرادى. اتالعان شىعارماشىلىق ۇجىمىنىڭ ساحناسىندا دا كوپتەن بەرى قويىلماعان كەيبىر سپەكتاكلدەر وسى جىلى قايتا جاڭعىرتىلماق.