الەم چەمپيوناتىنا بارۋعا قاۋقارىمىز جەتە مە؟

جاۋاپتى ەكى ماتچ كۇتىپ تۇر

ازىرگە بۇل سۇراققا ناقتى جاۋاپ بەرۋ­گە ەرتە. ويتكەنى جەرلەستەرىمىز ازيا ايماعىنداعى الەم كۋبوگىنىڭ سوڭعى ىرىكتەۋ جارىسىنا قاتىسىپ جاتىر. قازىرگى تاڭدا قازاقستان قۇراماسىمەن ءبىر توپتا ويناپ جاتقان اۋستراليا, قىتاي جانە جاپونيا باسكەتبولشىلارى ىرىكتەۋ ماتچتارىنىڭ اياقتالۋىنا ءالى ەكى تۋر بار بولسا دا, مەرزىمىنەن بۇرىن الەم چەمپيوناتىنىڭ جولداماسىن جەڭىپ الدى. سونداي-اق فيليپپين, جاڭا زەلانديا, ليۆان قۇرامالارى دا بيىلعى جىلدىڭ باستى دوداسىنا قاتىساتىنى بەلگىلى بولدى. ال قالعان ەكى جولدامانى قازاقستان, يران, يوردانيا جانە ساۋد ارابياسى قۇرامالارى ساراپقا سالادى.

جالپى دۇنيەجۇزىلىك باسكەتبول فەدەراتسياسىنىڭ ەرەجەسى بويىنشا الەم چەمپيوناتىنا ەۋروپانىڭ – 12, ازيا جانە مۇحيت ايماعىنىڭ – 8 (جارىستى ۇيىمداستىرۋشى مەملەكەتتەردى قوسا ەسەپتەگەندە), سولتۇستىك جانە وڭتۇس­تىك امەريكانىڭ – 7 جانە افريكا قۇر­لىعىنىڭ 5 قۇراماسى قاتىسادى. بۇگىنگە دەيىن الەم بىرىنشىلىگىندە باق سىنايتىن 32 قۇرامانىڭ 17-ءسى بەلگىلى بولىپ قويدى.

اتاپ ايتقاندا, كارى قۇرلىق وكىلدە­رىنە بەرىلگەن 12 جولدامانىڭ توعىزىن فينليانديا, فرانتسيا, گەرمانيا, گرەكيا, يتاليا, لاتۆيا, ليتۆا, سلوۆەنيا جانە يسپانيا باسكەتبولشىلارى يەلەنىپ قوي­سا, سولتۇستىك جانە وڭتۇستىك امەريكا, سون­داي-اق افريكا قۇرلىعىندا ءبىر عانا قۇرامالاردىڭ ەنشىسىندە جولداما بار. امەريكالىقتاردان ازىرگە جالعىز جولدامانى كانادا قۇراماسى قورجىنعا سالسا, افريكادان كوت د’يۆۋار باسكەتبولشىلارى ولجالاعان.

جولدامادان ءۇمىتتى قۇرامالار

بيىلعى الەم چەمپيوناتىنا قاتىسا­تىن بارلىق قۇرامانىڭ ەسىمى 2023 جىلعى 23-27 اقپان ارالىعىندا انىقتالادى. وسى ۋاقىت ارالىعىندا بارلىق قۇرلىقتاعى ىرىكتەۋ تۋرنيرلەرىنىڭ سوڭعى ماتچتارى وتەدى.

ەۋروپادا سوڭعى ءۇش ليتسەنزيانى «I», «K» جانە «L» توبىنداعى قۇرامالار ساراپقا سالادى. قازىرگى تاڭدا ءۇش توپ­تىڭ وكىلدەرى ءبىر عانا جولداما ءۇشىن وينايتىن بولادى. «I» توبىنداعى جالعىز جولدامانىڭ يەگەرى گرەكيا مەن سەربيا قۇرامالارى اراسىنداعى شەشۋشى ماتچ­تا انىقتالادى. جەڭگەنى الەم چەمپيو­ناتىنا بارادى. «K» توبىنداعى سوڭ­عى جولداماعا بىردەن ءۇش قۇراما ۇمىت­كەر. ولار: چەرنوگوريا, بوسنيا جانە گەرتسەگوۆينا, سونداي-اق ماجارستان. بۇل توپتا بوسنيا مەن ماجارستانعا قاراعاندا چەرنوگوريالىقتاردىڭ مۇمكىندىگى جو­عارى. ويتكەنى ولار سوڭعى ەكى تۋردىڭ بىرەۋىندە جەڭىسكە جەتسە جەتىپ جاتىر. «L» توبىندا گرۋزيا, يسلانديا جانە ۋكراي­نا قۇرامالارىنىڭ الەم چەمپيوناتىنا قاتىسۋ مۇمكىندىكتەرى ساقتالىپ تۇر. دەگەنمەن العاشقى ەكى كوماندا جەڭىس سانى بويىنشا ۋكراينادان الدا كەلەدى. بىراق سوڭعى تۋردا گرۋزيا مەن يسلانديا ءبىر-بىرىمەن كەزدەسەتىنىن ەسكەرسەك, ۋكراينا باسكەتبولشىلارى قالعان ەكى ويىندا ۇپاي جوعالتپاۋعا تىرىسادى.

امەريكالىقتارعا بەرىلەتىن جەتى جولدامانىڭ بىرەۋىن قانادا قۇراماسى يەلەنىپ قويعانىن جوعارىدا ايتتىق. ال باسكەتبولدى ۇلتتىق ويىنى دەپ بىلەتىن اقش قۇراماسى ءالى جولداما ءۇشىن كۇ­رەسىپ جاتىر. دەسە دە ءوز توبىندا كوش باس­­تاپ تۇرعان داڭقتى مايكل دجور­دان­نىڭ ءىزباسارلارىن قالعان ەكى ماتچتا ەشقانداي قۇراما توقتاتا المايتىنى انىق. سوندىقتان بيىلعى الەم چەمپيو­ناتى دا بەس دۇركىن الەم بىرىنشىلىگىنىڭ جەڭىمپازدارىنىڭ قاتىسۋىمەن وتەدى. ال قالعان بەس جولداماعا التى قۇراما ۇمىتكەر. ولار: ۆەنەسۋەلا, دومينيكان رەسپۋبليكاسى, ارگەنتينا, برازيليا, پۋەرتو-ريكو جانە مەكسيكا. بۇل ال­تىلىقتىڭ ىشىنەن الداعى ەكى تۋردا باعى جانباعان ءبىر قۇراما الەم چەمپيوناتىنان تىس قالادى.

افريكا ايماعىنداعى سوڭعى تۋر ويىندارى ءوز الاڭىنداعى جانە سىرت الاڭداعى ماتچ دەپ بولىنبەي, كاير (مىسىر) جانە لۋاندادا (انگولا) قالالارىندا وتەدى. ەكى توپقا بولىنگەن 12 قۇرامانىڭ ءالى وينال­ماعان ءۇش تۋر ماتچتارى بار. ازىرگە انگولا (ە توبى), وڭتۇستىك سۋدان مەن مىسىر (F توبى) قۇرامالارىنىڭ الەم چەمپيوناتىنا بارۋ مۇمكىندىگى جوعارى. سونىمەن قاتار نيگەريا, كابو-ۆەردە, سەنەگال جانە تۋنيس باسكەتبولشىلارى دا قالعان ليتسەنزيالار ءۇشىن كۇرەستى جالعاستىرىپ جاتىر.

ازيا مەن مۇحيت ايماعىنا توقتالار بولساق, ازىرگە ەكى توپتان ءبىر-ءبىر قۇرا­مانىڭ ليتسەنزيا يەلەنۋ مۇمكىندىگى بار. ماسەلەن, مۇحيت ايماعىنىڭ «L» تو­بىنداعى سوڭعى ليتسەنزياسى ءۇشىن يور­دانيا مەن ساۋد ارابياسى قۇراماسى سىنعا تۇسەدى. ال ازيا ايماعىنىڭ «F» توبىنداعى سوڭعى جولداماسى ءۇشىن كۇرەس يران مەن قازاقستان قۇرامالارى اراسىندا ءجۇرىپ جاتىر. وكىنىشكە قاراي, قازاقستانعا قاراعاندا يران قۇراماسىنىڭ الەم چەمپيوناتىنا بارۋ مۇمكىندىگى جوعارى بولىپ تۇر. ويتكەنى پارسى شىعاناعى وكىلدەرىنىڭ ءبىزدىڭ قۇراماعا قاراعاندا ءبىر جەڭىسى كوپ. سوڭعى تۋردا ەكى كوماندا قالعان ويىندارىن سىرت الاڭدا وتكىزەدى. ماسەلەن, ولەگ كيسەليوۆ جاتتىقتىراتىن قازاقستان قۇراماسى 23 اقپاندا قىتاي باسكەتبول­شىلارىمەن كەزدەسسە, 26 اقپاندا اۋس­تراليا قۇراماسىمەن سىنعا تۇسەدى. ال يران باسكەتبولشىلارى جاپونيا مەن قىتايعا ساپار شەگەدى.

جەرلەستەرىمىز ىرىكتەۋدە قالاي ويناپ جاتىر؟

ازيا ايماعىندا الەم چەمپيوناتىنا جولداما بەرەتىن ويىندار ەكى كەزەڭنەن تۇرادى. 2021-2022 جىلى وتكەن الەم كۋبوگىنىڭ ءبىرىنشى ىرىكتەۋ كەزەڭىندە قازاق­ستان قۇراماسى D توبىندا سيريا, يران جانە باحرەين قۇرامالارىمەن ويناپ, التى ماتچتىڭ بەسەۋىندە جەڭىسكە جەتتى. وكىنىشكە قاراي, جەرلەستەرىمىز سوڭعى تۋردا ەلورداداعى «سارىارقا» ۆەلوترەگىندە وتكەن اسا تارتىستى ماتچتا باحرەين قۇراماسىنا جول بەردى – 82:51 (29:24, 28:5, 12:10, 13:12). دەگەنمەن قالعان بارلىق ويىندا قارسىلاستارىن تىزە بۇكتىرگەن قازاقستان باسكەتبولشىلارى D توبىندا 1-ورىن الىپ, ىرىكتەۋدىڭ 2-اينالىمىنا جولداما الدى.

ءبىرىنشى ىرىكتەۋ كەزەڭىنىڭ العاشقى ويىنىن استانادا وتكىزگەن قازاقستان قۇراماسى 2021 جىلدىڭ 6 قاراشاسىندا سيريانى 84:74 ەسەبىمەن تىزە بۇكتىرسە, اراعا ءۇش كۇن سالىپ سيرياداعى جاۋاپ­تى ماتچتا 81:71 ناتيجەسىمەن ەكىنشى رەت جەڭىسكە جەتتى. ال 2022 جىلدىڭ 24 اقپانىندا سىرت الاڭدا يران باسكەتبولشىلارىنان 73:69 ەسەبىمەن باسىم تۇسسە, 27 اقپاندا باحرەيندى ءوز ەلىندە 95:48 ەسەبىمەن تاس-تالقان ەتتى. 2022 جىلدىڭ شىل­دەسىندەگى ەكى ماتچتىڭ العاشقىسىندا يران­دى 8 ۇپاي ايىرماشىلىعىمەن (68:60) ۇتسا, سوڭعى تۋردا باحرەينگە جول بەردى.

ال 2022 جىلدىڭ تامىز ايىندا باس­تالعان الەم كۋبوگىنىڭ ەكىنشى ىرىكتەۋ كەزەڭىندە جەرلەستەرىمىز باحرەين, يران, اۋستراليا, قىتاي جانە جاپونيا قۇرا­مالارىمەن ءبىر توپتا ويناپ جاتىر. ءبىر ايتا كەتەرلىگى, قازاقستان باسكەتبولشىلارى ءبىرىنشى اينالىمدا باحرەين جانە يرانمەن ءبىر توپتا ويناعاندىقتان, بۇل جولعى ىرىكتەۋدە بۇل قۇرامامەن جولدارى تۇيىسپەيدى.

ءبىرىنشى ىرىكتەۋدە ءساتتى ونەر كورسەتكەن قازاقستان قۇراماسىنىڭ باسكەتبولشىلارى ەكىنشى ىرىكتەۋ سايىستارىندا وتە سۇرەڭسىز ويناپ جاتىر. بۇگىنگە دەيىن ءتورت تۋرعا قاتىسقان جەرلەستەرىمىز بارلىق ويىندا قارسىلاستارىنا جول بەردى. ماسەلەن, 2022 جىلدىڭ تامىز ايىندا وتكەن ەكى ماتچتىڭ العاشقىسىندا قىتاي قۇرا­ماسىنان 68:58 ۇپايىمەن جەڭىلسە, كەيىننەن جاپونياعا قارسىلىق كورسەتە المادى – 73:48. ال قاراشاداعى ماتچتاردا اۋستراليادان – 97:50, جاپونيادان 81:61 ناتيجەسىمەن جەڭىلىپ قالدى.

باسكەت­بولدان 2023 جىلعى الەم كۋبوگى 25 تامىز بەن 10 قىركۇيەك ارالى­عىندا بىردەن 3 مەملەكەتتە – يندونە­زيا, جاپونيا جانە فيليپپيندە وتەدى. قا­زاقستان قۇراماسى 2019 جىلى الەم كۋبوگىنىڭ ەكىنشى ىرىكتەۋ كەزەڭىنە وتكەنى­مەن, فينالدىق سايىسقا جولداما الا الماعان ەدى.