استانانىڭ «بارىسى» قۇرلىقتىق حوككەي ليگاسىنداعى (قحل) كەزەكتى تۋر ويىنىن ەلوردادا نيجنەكامسكىنىڭ «نەفتەحيميك» كومانداسىمەن وتكىزدى.
تۇراقتى بىرىنشىلىكتىڭ كەيىنگى ەكى ويىنىندا ۆلاديۆوستوكتىڭ «ادميرالى» (3:0) مەن ماسكەۋدىڭ تسسكا (5:2) كلۋبتارىنان جەڭىلگەن جەرلەستەرىمىز بۇل جولى دا جانكۇيەرلەرىن جەرگە قاراتتى. «بارىس ارەنا» مۇز سارايىندا وتكەن كەزدەسۋدىڭ العاشقى ەكى كەزەڭىندە ەسەپتە الدا تۇرعان جەرلەستەرىمىز سوڭعى 20 مينۋتتىقتا جەڭىستى ۋىسىنان شىعارىپ الدى. كەزدەسۋدىڭ ەسەبىن بەسىنشى مينۋتتا «بارىستىڭ» ۇزدىك سۇرمەرگەندەرىنىڭ ءبىرى ۆەي اشىپ, مۇزايدىنعا جينالعان جانكۇيەرلەرگە قۋانىش سىيلادى.
ۇزىلىستەن كەيىن قوناقتار ساپىنان ەگور پوپوۆ (28-مينۋت) مەرگەندىگىمەن كوزگە ءتۇسىپ, تارازى باسىن تەڭەستىرگەنىمەن, «نەفتەحيميك» جانكۇيەرلەرىنىڭ قۋانىشى ۇزاققا سوزىلمادى. ارادا ەكى مينۋت وتكەندە انتون ساگادەەۆ «بارىستى» ەسەپتە قايتادان العا شىعارسا, 36-مينۋتتا ليندەن ۆەي ايدىن يەلەرىنىڭ ءۇشىنشى شايباسىن سوقتى. دەگەنمەن, ەكىنشى كەزەڭنىڭ اياقتالۋىنا ەكى مينۋت قالعاندا اندرەي بەلوزيوروۆ دالدىك تانىتىپ, ەسەپتى 3:2-گە جەتكىزدى. ال ءۇشىنشى كەزەڭدە قوناق كوماندانىڭ حوككەيشىلەرى يۋليۋس گۋداچەك قورعاعان قاقپاعا جاۋاپسىز ءۇش شايبا ەنگىزدى. گولدىڭ اۆتورلارى – اندرەي چيۆيلەۆ (41-مينۋت), ميحايل سيدوروۆ (53), پاۆەل رۋدين (58). قورىتىندى ەسەپ – 5:2.
«بارىس» كەلەسى ويىنىن بۇگىن ءنوۆوسيبيردىڭ «سيبيرىمەن» وتكىزەدى.