«Amanat» پارتياسىنىڭ توراعاسى ەرلان قوشانوۆ اتىراۋ وبلىسىنىڭ جۇرتشىلىعىمەن كەزدەستى. كەزدەسۋ بارىسىندا پارتيا باسشىسى وڭىرلىك فيليال جانىنداعى كەڭەس بەرۋ ورتالىعىنىڭ قىزمەتىمەن تانىسىپ, «قۇقىقتىق كومەك» پارتيالىق جوباسىنىڭ ىسكە قوسىلعانىن جەتكىزدى.
پارتيا توراعاسى يساتاي اۋدانىندا بەلگىلى قۇقىق قورعاۋشى ابزال قۇسپانمەن بىرگە جەرگىلىكتى تۇرعىندارمەن كەزدەسىپ, ازاماتتاردى قابىلدادى.
مەملەكەت باسشىسى ادىلەتتى قازاقستاندى قۇرۋ جولىندا ادام قۇقىقتارى ماسەلەسىنە باسا ءمان بەرىپ وتىرعانىن اتاپ وتكەن ەرلان قوشانوۆ كونستيتۋتسيالىق سوت قۇرىلىپ, باس پروكۋراتۋرا مەن ادام قۇقىقتارى جونىندەگى ۋاكىل كونستيتۋتسيالىق مارتەبەگە يە بولعانىن دا العا تارتتى. حالىق اراسىندا قۇقىقتىق ماسەلەلەر وتە وزەكتى. سوعان بايلانىستى, وڭىردە تۇرعىنداردىڭ قۇقىعىن قورعايتىن «قۇقىقتىق كومەك» پارتيالىق جوباسى پيلوتتىق رەجىمدە ىسكە قوسىلدى.
«جاسىراتىنى جوق, قوعامدا ازاماتتاردىڭ قۇقىقتىق, قارجىلىق ساۋاتتىلىعى ءالى دە تومەن. سونىڭ سالدارىنان, ولار سوتتا نەمەسە باسقا دا مەملەكەتتىك ورگانداردا مۇددەلەرىن قورعاي الماي جاتادى. شالعايداعى اۋىل تۇرعىندارىنىڭ ءبارى بىردەي مۇنداي كاسىبي كومەككە قول جەتكىزە الماي وتىرعاندىقتان, جاڭا پارتيالىق جوبا اياسىندا زاڭگەرلەر اۋىل-اۋىلدى ارالاپ, حالىققا ارنايى قۇقىقتىق كومەك كورسەتەدى. ادىلدىك پەن زاڭنىڭ ۇستەمدىك قۇرۋى وسىنداي ناقتى ىستەردەن باستالادى», دەدى پارتيا توراعاسى.
«قۇقىقتىق كومەك» پارتيالىق جوباسى شەڭبەرىندە زاڭگەرلەر جەرگىلىكتى جەردە ازاماتتارعا زاڭگەرلىك كومەك كورسەتۋ ءۇشىن وبلىستاعى اۋدان ورتالىقتارىنا بارادى. ياعني سوتتا, قىلمىستى قۋدالاۋ ورگاندارىندا جانە تاعى باسقا جاعدايدا ازاماتتارعا وكىلەتتىك ەتۋگە, ارىز-تالاپ تولتىرۋعا, ءوزىن قورعاۋعا كومەك كورسەتىلەدى. تۇرعىندارعا قارجى جانە قۇقىقتىق ماسەلەلەر بويىنشا ءتۇرلى كەڭەس بەرىلەدى.
سونىمەن قاتار ەرلان قوشانوۆ پارتيانىڭ اتىراۋ وبلىستىق فيليالى جانىنان اشىلعان «Amanat Service» كەڭەس بەرۋ ورتالىعىنىڭ قىزمەتىمەن تانىستى. مۇندا ءبىر تەرەزە قاعيداتى بويىنشا مەملەكەتتىك ورگاندار, «وتباسى بانكى», «E-gov»-تىڭ وكىلدەرى ازاماتتاردىڭ وتىنىشتەرىن قابىلدايدى. سونداي-اق ساۋلەت, ەڭبەك, تۇرعىن ءۇي قاتىناستارى سالاسى جانە حالىقتى تولعاندىراتىن وزگە دە ماسەلەلەر بويىنشا زاڭنامانى تۇسىندىرەدى.
وسى كۇنى ەرلان قوشانوۆ «اقتوبە-اتىراۋ-استراحان» باعىتىندا سالىنىپ جاتقان رەسپۋبليكالىق ماڭىزى بار جول ۋچاسكەسىنە باردى. مەردىگەر ۇيىمنىڭ وكىلدەرى وعان قۇرىلىس جۇمىسىنىڭ بارىسى تۋرالى باياندادى. جوبا جىل سوڭىنا دەيىن اياقتالادى دەپ جوسپارلانىپ وتىر. سونداي-اق ەرلان قوشانوۆ «Amanat»-تىڭ وبلىستىق اكتيۆىمەن كەزدەسىپ, پارتيالىق جوبالاردىڭ ىسكە اسىرىلۋ بارىسىن جانە الداعى ءماجىلىس پەن ءماسليحاتتار دەپۋتاتتارىنىڭ سايلاۋىنا دايىندىق ماسەلەسىن تالقىلادى. بۇگىندە وبلىستا 106 باستاۋىش پارتيا ۇيىمى بىرىكتىرىپ وتىرعان 23 مىڭنان استام اماناتتىق بار.