بۇعان دەيىن ءبىز ۇستەل تەننيسىنەن قاتاردىڭ استاناسى – دوحادا الەم چەمپيوناتىنىڭ ىرىكتەۋ ءتۋرنيرى ءوتىپ جاتقانى جانە سول جارىستا قازاقستان قۇراماسى ەكى جولداماعا يەلىك ەتكەنى جايىندا جازعان ەدىك.
كەشە پارسى شىعاناعىنان تاعى ءبىر قۋانىشتى حابار كەلىپ جەتتى. ەلىمىزدىڭ ەڭ ۇزدىك ۇستەل تەننيسشىسى كيريلل گەراسيمەنكو شەشۋشى تۇستا سينگاپۋرلىق كلارەنس چجە يۋدى 4:1 ەسەبىمەن ۇتىپ, الەم چەمپيوناتىنىڭ جولداماسىن ەنشىلەدى. ارينە, وعان ەش تاڭدانۋعا بولمايدى. ويتكەنى 26 جاستاعى كيريلل وسىعان دەيىن دە كوپتەگەن حالىقارالىق جارىستا تابىستى ونەر كورسەتىپ, سان مارتە جەڭىس تۇعىرىنا كوتەرىلدى. ول 2016 جىلى ريو-دە-جانەيرو جانە 2021 جىلى توكيو وليمپيادالارىنا قاتىستى. بىرەر جىل گەرمانيانىڭ بۋندەسليگاسىندا باق سىنادى. بۇگىندە گەراسيمەنكو الەمدىك رەيتينگتە 30-ورىندى يەلەنىپ وتىر.
ەستەرىڭىزگە سالا كەتەيىك, وسىعان دەيىن جۇپتىق باسەكەدە كيريلل گەراسيمەنكو مەن الان قۇرمانعاليەۆ جانە ارالاس جۇپتار سايىسىندا ايدوس كەنجەعۇلوۆ پەن زاۋرەش اقاشەۆا جولدامانى قالتالارىنا باسقان ەدى.