ونەركاسىپ – ۇلتتىق ەكونوميكانىڭ كۇرەتامىرىنا اينالعان ماڭىزدى سەكتور. سەبەبى مۇندا پايدالى قازبا مەن باسقا دا تابيعي شيكىزاتتى وندىرۋدەن باستاپ, وڭدەۋگە ماشىقتانعان ءارى حالىققا الۋان ءتۇرلى تاۋارلار شىعارىپ, ۇسىناتىن كاسىپورىنداردىڭ قىزمەتى جولعا قويىلعان.
وتكەن جىلدىڭ قاڭتار-قاراشا ايلارى ارالىعىندا ونەركاسىپتەگى ءوندىرىس كولەمى 2021 جىلداعى كەزەڭمەن سالىستىرعاندا 101,4 پايىزعا جەتتى. بۇل ءوسىم وڭدەۋ (4,2 پايىز), مەتاللۋرگيا (3,9 پايىز), ماشينا جاساۋ (8,9 پايىز) جەڭىل ونەركاسىپ (6,9 پايىز), سونداي-اق ءتۇستى مەتالل كەندەرىن ءوندىرۋ سالاسىنداعى (5,9 پايىز) ءوندىرىس كولەمىنىڭ ۇلعايۋى ەسەبىنەن بايقالىپ وتىر. سونىمەن بىرگە تاۋ-كەن ونەركاسىبىندەگى كورسەتكىش 0,9 پايىزعا تومەندەگەن.
بىلتىر يندۋستريا جانە ينفراقۇرىلىمدىق دامۋ مينيسترلىگى ونەركاسىپتەگى تسيفرلى تەحنولوگيالاردى ەنگىزۋگە بايلانىستى ىنتالاندىرۋدىڭ تىڭ تەتىكتەرىن ەنگىزىپ, بۇل ونەركاسىپتىك-يننوۆاتسيالىق قىزمەت سۋبەكتىلەرىنىڭ ەڭبەك ونىمدىلىگىن ارتتىرۋعا سەپتىگىن تيگىزۋگە ءتيىس.
ونەركاسىپكە مەملەكەتتىك ىنتالاندىرۋ شارالارىن ۇسىنۋ قاعيدالارىنا سايكەس شىعىنداردى وتەۋ يندۋستريا 4.0 تەحنولوگيالارىن ەنگىزۋگە جانە اۆتوماتتاندىرىلعان باسقارۋ جۇيەلەرىن ازىرلەۋگە نەمەسە قولدانىسقا ەنگىزۋگە (ونىڭ ىشىندە ليتسەنزيالىق باعدارلامالىق قامتاماسىز ەتۋدى ساتىپ الۋعا) بەرىلەدى. قازىر 6 ونەركاسىپتىك كاسىپورىن IT-شەشىمدەرگە جۇمسالعان شىعىنداردىڭ ورنىن تولتىرا الدى.
سونىمەن قاتار مينيسترلىك ساتىپ الىناتىن جابدىق قۇنىنىڭ 50 پايىزى (750 ملن تەڭگەدەن اسپايتىن) مولشەرىنە دەيىن تەحنولوگيالىق جابدىقتى جاڭعىرتۋعا ارنالعان ونەركاسىپتىك گرانتتى ۇسىنۋ ارقىلى ءوندىرىس ورىندارىن قولداۋدى جالعاستىرىپ كەلەدى. بيىل رەسپۋبليكالىق بيۋدجەتتەن اتالعان گرانتتى ۇسىنۋعا 1,6 ملرد تەڭگە قاراستىرىلعان.
بۇعان قوسا يندۋستريا جانە ينفراقۇرىلىمدىق دامۋ مينيسترلىگى ونەركاسىپتى قولداۋدىڭ قوسىمشا شارالارى رەتىندە 2023 جىلدا بىرقاتار ءىس-شارا وتكىزۋدى جوسپارلاپ وتىر. ونىڭ ىشىندە حالىقارالىق تاۋ-كەن مەتاللۋرگيا كونگرەسى فورۋمى مەن شەتەلدىك دەلەگاتتاردىڭ قاتىسۋىمەن قازاقستاننىڭ ماشينا جاساۋشىلارىنىڭ XI فورۋمىن وتكىزۋ بار.
Astana Mining & Metallurgy تاۋ-كەن يندۋسترياسىنداعى اۋقىمدى ءىس-شارالاردىڭ ءبىرى سانالادى. ونىڭ ديالوگ الاڭىندا B2B جانە G2B فورماتىندا جەر قويناۋىن يگەرۋمەن اينالىساتىن ءىرى كومپانيالار مەن قازاقستاننىڭ مەملەكەتتىك قۇرىلىمدارىنىڭ وكىلدەرى كەزدەسىپ, سالالىق كورمە, نەتۋوركينگ جانە «التىن گەفەست» سالالىق بايقاۋى وتكىزىلەدى. جىل سايىن ۇيىمداستىرىلاتىن Astana Mining & Metallurgy كونگرەسى سالاارالىق ينۆەستيتسيالىق بايلانىستى كەڭەيتۋگە, جاڭا كەلىسىمشارتتار جاساۋعا جانە زاماناۋي سىن-قاتەرلەرگە بىرلەسكەن شەشىمدەردى ازىرلەۋگە اسەرىن تيگىزىپ وتىر.
ال قازاقستان ماشينا جاساۋشىلار فورۋمىنىڭ ماڭىزدىلىعى سول, مۇندا اۆتوكولىك وندىرىسىنەن بولەك, ەلىمىزدىڭ وڭدەۋ ونەركاسىبىن دامىتۋ ستراتەگياسى قالىپتاستىرىلىپ, سالالىق كاسىپورىنداردى ارزان باعاداعى شيكىزاتپەن قامتاماسىز ەتۋدىڭ جانە جەرگىلىكتى قامتۋدى دامىتۋدىڭ جاڭا تەتىكتەرى قاراستىرىلىپ كەلەدى. بۇدان باسقا بيىل قازاقستاندىق كاسىپورىنداردىڭ ەلىمىزدىڭ اۋماعى مەن رەسەي فەدەراتسياسى جانە وزبەكستاندا وتكىزىلەتىن «يننوپروم» كورمەسى اياسىنداعى ءتۇرلى اۋقىمدى ءىس-شارالارعا قاتىسۋى جوسپارلانعان.