بىلتىر تۇركىستان وبلىسىندا بالالار جىلىن كوزدەلگەن ماقساتىنا ساي وتكىزۋ ءۇشىن اتقارىلار ءىس-شارالار 7 باعىتتا جوسپارلانىپ, 5,2 ملرد تەڭگە قارالدى. جىل بويى ىرگەلى دە يگىلىكتى 83 ءىس-شارا ىسكە اسىرىلدى.
بالالار جىلى اياسىندا «دارا» قورىنىڭ قولداۋىمەن ماقتاارال, سارىاعاش, ورداباسى اۋداندارىندا تۇزەتۋ كابينەتتەرىنىڭ فيليالدارى اشىلىپ, وعان قور تاراپىنان 12 ملن تەڭگە قاراجات بولىنگەن. ناتيجەسىندە, ەرەكشە ءبىلىم بەرۋدى قاجەت ەتەتىن بالالارعا ءتيىستى كوررەكتسيالىق جۇمىستار كورسەتۋ ساپاسى جاقساردى. سونىمەن قاتار 11 ايدا وبلىستىق دەنساۋلىق ساقتاۋ مەكەمەلەرىندە 9 845 بالا وڭالتۋ ەمىن, 3 892 بالا ساۋىقتىرۋ ەمىن قابىلداعان. رەسپۋبليكالىق وڭالتۋ ورتالىقتارىندا 507 بالا ەم العان. وبلىستاعى 38 قوسىمشا ءبىلىم بەرۋ مەكەمەلەرىندە – 28 500 وقۋشى, مەكتەپتەگى ۇيىرمەلەردە 355 600 وقۋشى قوسىمشا بىلىممەن قامتىلىپ, قامتۋ كورسەتكىشى 70,1% (384 100 وقۋشى) بولدى. ال قازىعۇرت اۋدانىندا 120 بالاعا ارنالعان, كەلەس اۋدانىندا 320 بالاعا جانە سايرام اۋدانىندا 300 وقۋشىعا ارنالعان جاڭا وقۋشىلار ءۇيى اشىلدى. تۇلكىباس اۋدانى 150 بالاعا ارنالعان «ونەر» مەكتەبى, تۇركىستان قالاسىندا وقۋشىلاردى شىعارماشىلىققا ۇيرەتەتىن زاماناۋي تەحنيكامەن جابدىقتالعان «Fablab» شەبەرحاناسى اشىلدى. كەنتاۋ, ارىس, تولەبي اۋداندارىندا ءدال وسىنداي شەبەرحانالار ىسكە قوسىلماق. سونداي-اق رەسپۋبليكالىق «ۇلتتىق مەكتەپ ليگاسى» جارىسىندا وبلىس وقۋشىلارى 11 التىن, 9 كۇمىس, 7 قولا مەدالعا قول جەتكىزىپ, جالپىكوماندالىق ەسەپتە ەكى جىل قاتارىنان I ورىنعا يە بولدى. وبلىستا مەكتەپكە دەيىنگى بىلىممەن قامتۋ – 92,9%. بالالار جىلىن جانە 1 ماۋسىم – حالىقارالىق بالالاردى قورعاۋ كۇنى مەرەكەسىن وبلىس كولەمىندە جوعارى دەڭگەيدە وتكىزۋ ماقساتىندا «turan-balafest» ونكۇندىك فەستيۆالى وتكىزىلدى.
بالالار جىلى قورىتىندىلانعان ء«بارى دە بالالار ءۇشىن» مەرەكەلىك ءىس-شاراسىندا وسىنداي دەرەكتەر كەلتىرىلدى. «كونگرەسس حولل» كوپسالالى كەشەنىندە وتكەن جيىندا وبلىس اكىمىنىڭ ورىنباسارى بەيسەن تاجىباەۆ قۇتتىقتاۋ ءسوز سويلەپ, حالىقارالىق وليمپيادالار مەن بايقاۋلاردىڭ جەڭىمپازدارىنا قۇرمەت كورسەتتى. «ەلىمىزدىڭ پرەزيدەنتى قاسىم-جومارت توقاەۆ 2022 جىلدى بالالار جىلى دەپ جاريالادى. مۇنداعى ماقسات – قازاقستان بويىنشا وزدەرىڭىز سياقتى تالانتتى, دارىندى بالالارعا قولداۋ جاساپ, قوعامداعى ىزگىلىكتى ادامداردىڭ قاتارىنا قوسۋ. تۇركىستان وبلىسىندا بۇل ءىس-شارا جوعارى دەڭگەيدە ۇيىمداستىرىلدى. وڭىرىمىزدە مىڭعا جۋىق مەكتەپتە 514 مىڭ بالا ءبىلىم الىپ جاتىر. تۇركىستان – ەلىمىزدەگى ەڭ بالا سانى كوپ ءوڭىر. ءاربىر بەسىنشى ءسابي تۇركىستان وبلىسىندا دۇنيەگە كەلەدى. بىلتىر وڭىردە 14 مەكتەپ پايدالانۋعا بەرىلدى. الداعى ۋاقىتتا دا مەكتەپتەر سانى ارتادى», دەدى ب.تاجىباەۆ.
سالتاناتتى جيىندا حالىقارالىق وليمپيادالار مەن بايقاۋلاردا جەڭىمپاز اتانعان 18 وقۋشى باعالى سىيلىقپەن ماراپاتتالدى. سونىمەن بىرگە بالالار جىلى اياسىندا ۇزدىك اتانعان تۇركىستانداعى وقۋشىلار سارايى مەن قازىعۇرت جانە جەتىساي اۋداندارىنا ميكرواۆتوبۋستىڭ سەرتيفيكاتتارى تاپسىرىلدى. مەرەكەلىك كەشتە وبلىستىڭ جاس, وقۋشى ونەرپازدارى مەن رەسپۋبليكاعا تانىمال ەسترادا جۇلدىزدارى ونەر كورسەتتى.
تۇركىستان وبلىسى