قازاقتىڭ قايسار قىزى ءجاميلا باقبەرگەنوۆا ءۇشىن بىلتىرعى ماۋسىم وتە ءساتتى ءوتتى دەۋگە تولىق نەگىز بار. ويتكەنى قىزدار اراسىندا قازاقستاننىڭ ەڭ تانىمال بالۋان قىزى 2022 جىلدا وراسان زور تابىستارعا قول جەتكىزدى. سول ناتيجەلەرىنىڭ ارقاسىندا قانداسىمىز حالىقارالىق كۇرەس فەدەراتسياسى (UWW) بەكىتكەن بارلىق سالماقتاعى الەم رەيتينگىندە (72 كيلوعا دەيىنگى سالماقتا) 1-ورىنعا كوتەرىلىپ, جىلدى ءوز سالماعىنىڭ كوشباسشىسى رەتىندە اياقتادى.
بىلتىرعى بارىس جىلى باقبەرگەنوۆانىڭ كۇرەس الەمىندەگى باق-جۇلدىزىن جاقتى. تالايلاردى مويىنداتقان الاشتىڭ ارۋى 2022 جىلى سەربيانىڭ باس شاھارى – بەلگرادتا وتكەن الەم چەمپيوناتىنىڭ كۇمىس جۇلدەسىن موينىنا ىلسە, ونىڭ ءسال الدىندا موڭعوليا استاناسى – ۇلان-باتىرداعى سارى قۇرلىق بىرىنشىلىگىندە ەكىنشى مارتە تۇعىردىڭ ەڭ بيىك ساتىسىنان قول بۇلعادى. الەمدىك رەيتينگتە كوش باستاپ تۇرعان ءجاميلا بەلگرادتاعى باسەكەنى شيرەك فينالدان باستادى. العاشىندا ول وزبەكستاندىق سۆەتلانا وقنازاروۆانى 10:0 ەسەبىمەن ويسىراتا جەڭسە, جارتىلاي فينالدا وتانداسىمىزدىڭ جولى 23 جاستاعى بالۋاندار اراسىنداعى الەم بىرىنشىلىگى مەن ەۋروپا چەمپيوناتىنىڭ جۇلدەگەرى رۋمىنيالىق الەكساندرا انگەلمەن قيىستى. بۇل تارتىستا قازاق قىزى ايقىن باسىمدىق تانىتتى – 12:2. ال باس جۇلدە ءۇشىن وتكەن باسەكەدە باقبەرگەنوۆا امەريكالىق اميت ەلوردەن جەڭىلىپ, ەكىنشى رەت الەم چەمپيوناتىنىڭ كۇمىس جۇلدەسىن موينىنا تاقتى. ول 2021 جىلى وسلودا (نورۆەگيا) وتكەن جاھان بىرىنشىلىگىندە دە التىن مەدالعا سىنىق سۇيەم قالعاندا ءسۇرىنىپ, ەكىنشى ورىندى قاناعات تۇتقان بولاتىن.
ال موڭعولياداعى ازيا چەمپيوناتىندا جەرلەسىمىزدىڭ جۇلدىزى جاندى. سارى قۇرلىق دوداسىنىڭ العاشقى اينالىمدارىندا ول ۇندىستاندىق نيككي نيككي جانە وزبەكستاندىق سۆەتلانا وقنازاروۆانى جەڭسە, كەيىنگى باسەكەلەردە جارىس قوجايىنى موڭعوليالىق دااۆاناسان ەنح امار مەن ۇندىستاندىق سۋميرە نيكۋرا جاميلاعا ءبىراز قارسىلاسىپ باققانىمەن, قازاقتىڭ قىزى ەكىنشى رەت ازيا چەمپيونى اتانىپ, كۇللى الاش جۇرتىن قۋانتتى.
سونىمەن قاتار ول بيىل تۇركيانىڭ كونيا قالاسىندا الاۋى تۇتانعان يسلام ىنتىماقتاستىعى ويىندارىندا دا ۇزدىكتەر قاتارىنان كورىنىپ, الماتىدا ۇيىمداستىرىلعان بولات تۇرلىحانوۆ اتىنداعى گران-پري جارىسىندا قارسىلاس شاق كەلتىرگەن جوق. ال وسىدان بىرەر اپتا بۇرىن قانداسىمىز اقش-تىڭ ايوۆا شتاتىنداعى كورالۆيلل قالاسىندا وتكەن ەركىن جانە ايەلدەر كۇرەسىنەن جەر-جاھاننىڭ تەك ۇزدىك بالۋاندارى بەلدەسەتىن الەم كۋبوگىنە قاتىسىپ, الەم قۇراما كومانداسى ساپىندا بوزكىلەمگە شىقتى.
سونداي-اق كەيىپكەرىمىز وتكەن جىلدىڭ سوڭىندا مادەنيەت جانە سپورت مينيسترلىگى ۇيىمداستىرعان جىل ۇزدىكتەرىن انىقتايتىن «جەڭىمپاز رۋحى» ۇلتتىق سىيلىعىنىڭ جەڭىمپازى اتاندى. ول جازعى سپورت تۇرلەرى بويىنشا «جىلدىڭ ۇزدىك سپورتشىسى» اتالىمىندا ۇزدىك شىقتى.
«بىلتىرعى ماۋسىم مەن ءۇشىن ويداعىداي ءوتتى. ءوزىم قاتىسقان جارىستىڭ بارلىعىندا جۇلدەمەن ورالدىم. بۇل – جاتتىعۋ مەن ەڭبەكتىڭ ەش كەتپەگەنىن كورسەتەدى. ارينە, الەم چەمپيوناتىنىڭ فينالىندا بيىل قاتارىنان ەكىنشى رەت جەڭىلىپ, التىنعا قول سوزىم جەر قالعاندا توقتاعانىم ازداپ قىنجىلتادى. بەلگرادتاعى فينالدا نە جەتپەگەنىن بىلمەيمىن. بىراق الەم چەمپيوناتىنىڭ التىنى مەنىڭ باستى ماقساتىم بولىپ قالا بەرەدى. تەك قانا الەمنىڭ ەمەس, وليمپيادانىڭ دا چەمپيونى اتانۋدان ءۇمىتتىمىن», دەدى ءجاميلا باقبەرگەنوۆا وتاندىق باق وكىلىنە بەرگەن ءبىر سۇحباتىندا.