تەننيستەن قازاقستاننىڭ ءبىرىنشى, الەمنىڭ 21-راكەتكاسى ەلەنا رىباكينا اۋستراليانىڭ ادەلايدا قالاسىندا ءوتىپ جاتقان WTA 500 ءتۋرنيرىن ءساتتى باستاعانىمەن, ەكىنشى اينالىمدا جەڭىلىپ قالدى.
جەرلەسىمىز العاشقى اينالىمدا الەمنىڭ 14-ءشى, وسى جارىستىڭ 5-راكەتكاسى رەتىندە تىركەلگەن امەريكالىق دانيەل كوللينزبەن كەزدەسىپ, ءۇش سەتكە جالعاسقان باسەكەدە 5:7, 6:2, 6:3 ەسەبىمەن جەڭىسكە جەتتى. ءبىرىنشى پارتيادا امەريكالىق سپورتشى باسىم بولدى – 7:5. ەكىنشى سەتتە قازاقستاندىق تەننيسشى برەيك جاساپ, تارازى باسىن تەڭەستىرسە (6:2), شەشۋشى ساتتە رىباكينا قاتەلەسكەن جوق – 6:3.
وكىنىشكە قاراي, ەلەنا ەكىنشى اينالىمدا الەمنىڭ 69-راكەتكاسى ۋكراينالىق مارتا كوستيۋكتىڭ وسال تۇسىن تابا المادى. ەكى ساعات 23 مينۋتقا جالعاسقان باسەكەدە ۋكراينالىق تەننيسشى 6:7 (7:5), 6:2, 6:3 ەسەبىمەن جەڭىسكە جەتتى. ايتا كەتەيىك, رىباكينا بىلتىرعى تۋرنيردە فينالعا دەيىن جەتىپ, باس جۇلدە ءۇشىن وتكەن ماتچتا سول كەزدەگى الەمنىڭ ءبىرىنشى راكەتكاسى اۋستراليالىق ەشلي بارتيدەن جەڭىلىپ قالعان ەدى.