Air Astana اۋەكومپانياسى تاراتقان مالىمەتكە قاراعاندا, بۇگىن KC 128 رەيسىنىڭ بورتىندا قاتتى تۋربۋلەنتتىلىك بولعان, دەپ حابارلايدى Egemen.kz.
«بۇگىن اۋە كومپانياسى تاشكەنت-الماتى باعىتى بويىنشا كس 128 رەيسىن ورىندادى. ۇشاق جەرگىلىكتى ۋاقىت بويىنشا 14:35-تە ۇشىپ شىققان. ۇشۋ كەزىندە اۋە لاينەرى كەنەتتەن قاتتى تۋربۋلەنتتىلىككە تاپ بولدى. الدىن الا مالىمەتى بويىنشا, جەتى جولاۋشى ءتۇرلى دەنە جاراقاتتارىن العان», دەپ جازىلعان حابارلامادا.
اۋە لاينەرى الماتىعا ساعات 16.45-تە قوندى. ۇشاقتىڭ ەكيپاجى جولاۋشىلارعا العاشقى مەديتسينالىق كومەك كورسەتتى. ۇشقىشتار وقيعا تۋرالى اۋەجاي قىزمەتىنە حابارلاعان. جەدەل جاردەم كولىكتەرى كومەك كورسەتۋ ءۇشىن اۋەجايدا جولاۋشىلاردى كۇتىپ الدى.
اۋە كومپانياسى ورىن العان جاعدايعا وكىنەدى جانە رەيس جولاۋشىلارىنا قولدان كەلگەن كومەكتى كورسەتەدى. وقيعانىڭ ءمان-جايىن قۇزىرلى ورگاندار تەكسەرەتىن بولادى.