مەملەكەت باسشىسى قازاقستاندىقتاردى جاڭا جىلمەن قۇتتىقتادى

مىنە, ءبىز قازىر ءبىر ەل بولىپ, جاڭا جىلدى قارسى الامىز. ونى ءبارىمىز ىزگى نيەتپەن كۇتىپ وتىرمىز. وسى ساتتە مەرەكەلىك كوڭىل-كۇيمەن ءبىر-بىرىمىزگە اق تىلەك ايتامىز. بولاشاققا سەنىممەن قاراپ, جوسپار قۇرامىز. ميلليونداعان ازاماتتارىمىز سياقتى مەن جاڭا جىل جارىلقاسىن دەپ كەلەشەككە ۇمىتپەن قارايمىن. ءوتىپ بارا جاتقان جىل ەلىمىز ءۇشىن وڭاي بولعان جوق, كۇردەلى بولدى. قاڭتار ايىندا تاۋەلسىزدىك تاريحىنداعى زور سىن-قاتەرگە تاپ بولدىق. بىراق حالقىمىزدىڭ مىزعىماس بىرلىگىنىڭ ارقاسىندا ءبىز وسى قاتەردىڭ بەتىن قايتاردىق. ەلدىگىمىزدى ساقتاپ قالدىق. ءتول تاريحىمىزعا قاراساق, جۇرتىمىز كوپتەگەن سىنداردان شىڭدالىپ شىققان. ءبىز دە قيىندىقتاردى ارتقا تاستاپ, العا قاراي نىق قادام باستىق. جالپى, وسى جىل قازاقستان ءۇشىن تۇبەگەيلى بەتبۇرىس جىلىنا اينالدى. ءبىز مەملەكەتتىگىمىزدى نىعايتىپ, جاڭارۋ جانە جاڭعىرۋ جولىنا تۇستىك. جالپىحالىقتىق رەفەرەندۋم وتكىزىپ, شىن مانىندە جاڭا كونستيتۋتسيامىزدى قابىلدادىق. وندا ناعىز ادىلدىك رۋحى كورىنىس تاپتى. ەندى پرەزيدەنت 7 جىلدىق مەرزىمگە ءبىر رەت قانا سايلاناتىن بولدى. پارلامەنت جۇيەسىنىڭ رەفورماسىن باستادىق. حالقىمىز اۋقىمدى وزگەرىستەرگە قولداۋ ءبىلدىردى. سايلاۋ جۇيەسىنە جاڭا ەرەجەلەر ەنگىزىلدى. پرەزيدەنت سايلاۋى اشىق جانە ءادىل ءوتتى. مۇنىڭ ءبارى ەلىمىزدىڭ ساياسي جۇيەسىن جان-جاقتى جاڭعىرتا ءتۇستى. اكىمشىلىك-اۋماقتىق رەفورما جاسادىق. اباي, ۇلىتاۋ جانە جەتىسۋ وبلىستارى قۇرىلدى. ۇلتتىق قۇرىلتايدىڭ العاشقى وتىرىسى ءوتتى. ەڭ وزەكتى ماسەلەلەردى اۋقىمدى ديالوگ ارقىلى شەشەتىن بولدىق. «رەسپۋبليكا كۇنىنە» ۇلتتىق مەرەكە مارتەبەسى بەرىلدى.

بيىل ەلىمىز ءۇشىن نەسىبەلى جىل بولدى. 400 مىڭعا جۋىق ءسابي دۇنيەگە كەلىپ, كوپتەگەن وتباسىنىڭ شاڭىراعى باقىتقا تولدى. ءبىز بالالار جىلىندا «ۇلتتىق قور – بالالارعا» باستاماسىن كوتەردىك. بۇل – وسكەلەڭ ۇرپاقتىڭ جارقىن بولاشاعى ءۇشىن جاسالعان وتە ماڭىزدى قادام. ديقاندارىمىز 23 ميلليون توننا استىق جينادى. بوس جاتقان 5 ميلليون گەكتار جەر مەملەكەتكە قايتارىلدى.بىرنەشە ءىرى ءوندىرىس ىسكە قوسىلدى. مىڭداعان جاڭا جۇمىس ورىندارى اشىلدى. «قازاقستان حالقىنا» قورى قۇرىلدى, سونىڭ ارقاسىندا كوپتەگەن ازاماتقا ناقتى كومەك كورسەتىلىپ جاتىر. سپورتشىلارىمىز الەمدىك جارىستاردا كوك تۋىمىزدى جەلبىرەتتى. كۇردەلى گەوساياسي جاعدايدا قازاقستاننىڭ حالىقارالىق بەدەلىن ارتتىردىق, بىرقاتار الپاۋىت ەلدەردىڭ سەنىمدى سەرىكتەسى اتاندىق. وسىلايشا, بارىس جىلى اۋقىمدى وزگەرىستەر مەن جاڭا ءداۋىردىڭ باستاۋى بولدى. ءوتىپ بارا جاتقان 2022 جىل تاريحتا ەڭسەرۋ جىلى رەتىندە قالادى. ەلىمىز الاپات سىناققا توتەپ بەردى. قيىندىقپەن بەتپە-بەت كەلگەن قازاقستاندىقتار جارقىن بولاشاق ءۇشىن بىرىگە ءبىلدى. ءبىز شىڭدالا تۇستىك.

تۇبەگەيلى رەفورمالاردى جالعاستىرۋىمىزعا ەشبىر سىن-قاتەر كەدەرگى بولا المادى. ادىلەتتى قازاقستاندى قۇرۋ ءۇشىن بەرىك نەگىز قالاندى. ساياسي وزگەرىستەر دايەكتى تۇردە جۇزەگە اسىرىلىپ جاتىر. كونستيتۋتسيالىق رەفەرەندۋم مەن پرەزيدەنت سايلاۋى نەگىزگى بيلىك ينستيتۋتتارىن جاڭعىرتۋعا جول اشتى.

كەلەسى جىلى سەنات, ءماجىلىس جانە بارلىق دەڭگەيدەگى ءماسليحات دەپۋتاتتارىنىڭ سايلاۋى وتەدى. تۇرعىندار اۋدان اكىمدەرىن دە تىكەلەي سايلايدى. بۇل قادام ەلىمىزدە جاڭا دەموكراتيالىق ءداستۇردى قالىپتاستىرۋعا, ساياسي مادەنيەتتى ارتتىرۋعا جول اشاتىنىنا سەنىمدىمىن.

ادام قۇقىعىن قورعاۋ سالاسىندا ەداۋىر تابىسقا جەتتىك. ەكونوميكامىزدى مونوپوليادان ارىلتىپ, ونىڭ قۇرىلىمىن قايتا قۇرۋ ۇدەرىسىن باستادىق. ءبىز مۇنىمەن شەكتەلمەيمىز.

جاڭا جىلدا ساپالى جولدار, قولجەتىمدى تۇرعىن-ۇيلەر, زاماناۋي مەكتەپتەر مەن اۋرۋحانالار سالامىز. بيلىك كاسىپكەرلىكتى دامىتۋعا قولايلى جاعداي جاسايدى. ينفلياتسيانى اۋىزدىقتاپ, حالىقتىڭ ناقتى تابىسىن ارتتىرۋ جانە ءوندىرىستى جولعا قويۋ ۇكىمەتتىڭ باستى مىندەتى بولىپ قالا بەرەدى. مەن پرەزيدەنت لاۋازىمىنا قايتا سايلانعاننان كەيىن, ەڭ الدىمەن, اۋىلدى كوركەيتۋگە, اۋىلدىق اۋماقتاردى دامىتۋعا باعىتتالعان كەشەندى جۇمىستاردى باستاۋ تۋرالى جارلىققا قول قويدىم.

ءبىز ءوزى ىسىنە ادال, وتانىمىزدىڭ ناعىز پاتريوتتارى مەن كاسىبي ماماندارعا جان-جاقتى قولداۋ كورسەتەمىز. كاسىپورىنداردا ەڭبەك ەتەتىن جۇمىسشىلار جانە شارۋالار, عالىمدار مەن مادەنيەت قايراتكەرلەرى, اسكەريلەر مەن قۇقىق قورعاۋ جۇيەسىنىڭ قىزمەتكەرلەرى, ينجەنەرلەر مەن قۇرىلىسشىلار, كاسىپكەرلەر مەن سپورتشىلار, مەتسەناتتار مەن ۆولونتەرلەر, جۋرناليستەر مەن مەديا سالاسىنىڭ ماماندارى, سونداي-اق مۇعالىمدەر, تاربيەشىلەر, دارىگەرلەر, مەديتسينا جانە الەۋمەتتىك سالا قىزمەتكەرلەرى – حالقىمىزدىڭ ەرەن ەرلەرى. ءبىز كەلە جاتقان جاڭا جىلدان زور ءۇمىت كۇتەمىز. بارشاڭىزعا ءمالىم, الەمدەگى احۋال اسا كۇردەلى. سوعان قاراماستان, كەلەسى جىل ەلىمىز ءۇشىن جەمىستى جىل بولادى دەپ سەنەمىز. الدىمىزدا اۋقىمدى جۇمىس تۇر, كوپتەگەن جوسپارىمىزدى جۇزەگە اسىرۋىمىز كەرەك. نەگىزگى ماقسات – مەملەكەتىمىزدى نىعايتۋ جانە حالقىمىزدىڭ ءال-اۋقاتىن ارتتىرۋ. مەن پرەزيدەنت رەتىندە وسى ماقساتتارعا جەتۋ ءۇشىن بارلىق كۇش-جىگەرىمدى سالامىن. الداعى جىلى ۇلتتىڭ رۋحىن كوتەرەتىن ماڭىزدى ءىس-شارالار وتەدى. ءبىز ءبىر ەل بولىپ, ءبىر حالىق بولىپ, بىرلەسە ەڭبەك ەتىپ, جاڭا جىلدا جاڭا تابىسقا جەتەمىز. مەن بۇعان كامىل سەنەمىن. بيىلعى قيىندىقتارعا قاراماستان, ءبىز كەلەشەككە ۇلكەن ۇمىتپەن قارايمىز. الداعى 2023 جىل تىڭ مۇمكىندىكتەرگە قول جەتكىزىپ, بيىك بەلەستەردى باعىندىراتىن جىل بولادى دەپ سەنەمىن. الداعى جولىمىز وڭاي بولمايدى. الايدا كۇدىك پەن كۇماننەن ارىلىپ, كوزدەگەن ماقساتقا جەتۋ ءۇشىن باتىل قادام جاساۋ كەرەك. سوندا عانا مۇراتىمىزعا جەتەمىز.

«جاقسىلىق بار جەردە تاپشىلىق بولمايدى» دەيدى حالقىمىز. جاڭا جىلدا بارشامىز جاقسىلىققا ۇمتىلايىق. ءبىر-بىرىمىزگە جاناشىر, قامقور بولايىق. ەڭ باستىسى, تاباندى ەڭبەك ەتىپ, ەلىمىزدى بىرگە دامىتايىق. جاڭا جىل حالقىمىز ءۇشىن بەرەكەلى جىل بولسىن! ءار شاڭىراق شاتتىققا, قۋانىشقا تولسىن!بارشاڭىزعا زور دەنساۋلىق, مول تابىس تىلەيمىن! جاڭا جىل قۇتتى بولسىن, اعايىن!