بىلتىر جىل باسىنان قازان ايىنا دەيىنگى ارالىقتا اقشا اۋدارىمدارىنىڭ حالىقارالىق جۇيەسى ارقىلى شەت مەملەكەتتەردەن كەلگەن قارجى كولەمى 575,2 ملرد تەڭگە بولدى. 2021 جىلدىڭ قاڭتار-قازانىمەن سالىستىرعاندا كورسەتكىش 2,5 ەسەگە جوعارى.
ترانزاكتسيا سانى 46,7 پايىزعا, 1,4 ملن-عا, ال ءبىر اۋدارىمنىڭ ورتاشا چەگى 68 پايىزعا ءوسىپ, 414,1 مىڭ تەڭگەنى قۇراعان. الدىڭعى جىلى بۇل كورسەتكىش 246,5 مىڭ تەڭگە بولعان. اسىرەسە رەسەيدەن كەلەتىن اقشا اعىنى اجەپتاۋىر ارتقان. 2022 جىلدىڭ قاڭتار-قازان ايلارىندا رف-دان ەلىمىزگە 305,7 ملرد تەڭگە اۋدارىلدى. بۇل – الدىڭعى جىلعىدان 6,7 ەسەگە كوپ سوما. وسىلايشا, رف-دان كەلەتىن اقشا اۋدارىمدارى جالپى اۋدارىم ۇلەسىندە 19,6-دان 53,1 پايىزعا وسكەن.
ءبىر قىزىعى, بىلتىر قاڭتار, اقپان جانە ناۋرىز ايلارىندا رف-دان قازاقستانعا اۋدارىم كولەمى 2021 جىلعى كورسەتكىشتەن تومەن بولىپ تۇرعان. بىراق ۋكراينادا سوعىس باستالا سالىسىمەن كورسەتكىش كۇرت وسكەن جانە شىرقاۋ شەگىنە ماۋسىمدا جەتكەن – 66,9 ملرد تەڭگە. شىلدەدە رەسەيدەن قازاقستانعا جىبەرىلگەن اقشا كولەمى – 54,6 ملرد تەڭگە, تامىز بەن قىركۇيەكتە – 33,2 جانە 36 ملرد تەڭگە بولدى. رەسەيدە قىركۇيەكتىڭ سوڭىندا موبيليزاتسيا باستالعان سوڭ بىزگە جىبەرىلەتىن اقشا اۋدارىمدارىندا تاعى دا ءوسىم بايقالعان. ءوسىم 18,6 پايىزعا كوبەيىپ, 42,7 ملرد تەڭگەگە جەتىپتى.
سونىمەن بىرگە ايتارلىقتاي اقشا كولەمى قىرعىزستان (82,7 ملرد تەڭگە), وزبەكستان (42,4 ملرد تەڭگە), اقش (38,1 ملرد تەڭگە) جانە وڭتۇستىك كورەيادان (33,1 ملرد تەڭگە) كەلىپ تۇسكەن. كوپ رەتتە اقشا جىبەرۋشىلەر رەسەيلىك «زولوتايا كورونا» حالىقارالىق اۋدارىم جۇيەسىن پايدالانعان. وسى جۇيە ارقىلى ەلىمىزگە 406,5 ملرد تەڭگە قاراجات جىبەرىلدى. ودان كەيىنگى ورىنداردا Western Union (68,1 ملرد تگ), MoneyGram (46,2 ملرد تگ), Contact (36 ملرد تگ) جانە «يۋنيستريم» (16,2 ملرد تگ) جۇيەلەرى تۇر. تاعى 2,2 ملرد تەڭگە باسقا جۇيەلەر ارقىلى اۋدارىلعان.