استانا قالاسىندا جاڭا جىل مەرەكەسى قارساڭىندا اۋدان اكىمدەرى بالالاردى كەلە جاتقان مەرەكەمەن قۇتتىقتاۋ ءۇشىن ارنايى مەكتەپتەرگە باردى, دەپ حابارلايدى Egemen.kz ەلوردا اكىمدىگىنىڭ سايتىنا سىلتەمە جاساپ.
استانا قالاسى بايقوڭىر اۋدانىنىڭ اكىمى ەرلان جاۋلىباەۆ بالالاردى قۇتتىقتاپ, ولارعا اۋدان اكىمدىگى اتىنان ءتاتتى سىيلىقتار تابىستاۋ ءۇشىن №3 ارنايى مەكتەپكە باردى.
تاتتىلەردەن بولەك, وقۋشىلار كونتسەرتتىك باعدارلامادان جانە كەلەر جىلدىڭ باستى سيمۆولى – قويانمەن بىرگە ويىن وتكىزىپ, ەرەكشە اسەرگە بولەندى.
سونداي-اق اكىمدەر پەداگوگتەردى دە قۇتتىقتادى. ەلوردانىڭ سارىارقا اۋدانىنىڭ اكىمى ءجۇسىپ جۇماعۇلوۆ №2 ارنايى مەكتەپكە بارۋ بارىسىندا ەرەكشە بالالارمەن جۇمىس ىستەيتىن مامانداردىڭ جۇمىسىن ەرەكشە اتاپ ءوتتى.
«مۇعالىم – ۇلى ماماندىق. وسى مەكتەپتە ەرەكشە بالالاردى تاربيەلەپ, ولاردى دامىتۋ ارقىلى ۇلكەن جۇمىس اتقارىپ جۇرسىزدەر. بۇگىنگى قوعامنىڭ دامۋىنا ەرەكشە ۇلەس قوسىپ كەلەسىزدەر. ەڭبەكتەرىڭىزگە العىسىمىز شەكسىز! سىزدەرگە كومەك كورسەتۋگە ءاردايىم دايىنمىن», دەدى ءجۇسىپ جۇماعۇلوۆ.
ءوز كەزەگىندە ەسىل اۋدانىنىڭ اكىمى اسىلبەك ەسەنباەۆ №64 «اسىل بوبەك» ارنايى بالاباقشاسىنىڭ بالالارىن كەلە جاتقان جاڭا جىلمەن قۇتتىقتادى. ول سونداي-اق بالالارعا ءتاتتى سىيلىقتار بەرىپ, جىلى لەبىزدەرىن جەتكىزدى.
بيىل ارنايى مەكتەپ وقۋشىلارى ءۇشىن بىرقاتار مادەني-بۇقارالىق ءىس-شارا ۇيىمداستىرىلعانىن اتاپ وتكەن ءجون. ناقتىراق ايتقاندا, ويىن-ساۋىق ورتالىقتارىنا تەگىن بارۋ, قالا اكىمى مەن اۋدان اكىمدەرىنىڭ اتىنان كينوتەاتر مەن شىرشالارعا بارۋ.