ەلوردانىڭ سەگىز جاستاعى تۇرعىنى كارىم ايتجان الماتىدا بليتس پەن راپيدتەن وتكەن الەم چەمپيوناتىندا گروسسمەيستەر دانا رەيزنيەتسە-وزولدى جەڭدى, دەپ حابارلايدى Egemen.kz ەلوردا اكىمدىگىنە سىلتەمە جاساپ.
لاتۆيانىڭ ەكس-ەكونوميكا ءمينيسترى جانە قارجى ءمينيسترى, ال قازىر FIDE باسقارۋشى ديرەكتورى الماتى جانە استانانىڭ شاحمات اكادەميالارىنىڭ 24 وقۋشىسىمەن ءبىر مەزگىلدە ويىن سەانسىن وتكىزدى. ازيا چەمپيوناتىنىڭ قازىرگى كۇمىس جۇلدەگەرى ۇزاعىراق قارسىلاسىپ, اقىر سوڭىندا جەڭىسكە جەتتى.
كارىم استانا قالاسىنىڭ تۋماسى. قازىر ول ق.ساتباەۆ اتىنداعى BINOM مەكتەبىنىڭ 3-سىنىبىندا وقيدى. مۇعالىمدەردىڭ ايتۋىنشا, كارىمنىڭ ەستە ساقتاۋ قابىلەتى ەرەكشە. سول سياقتى جان-جاقتى قىزىعۋشىلىعى, تاپسىرمالاردى شەشۋگە دەگەن جىلدام قابىلەتى دە بار. 8 جاستاعى گروسسمەيستەر تاريحقا, گەوگرافياعا جانە فۋتبولعا ەرەكشە قىزىعادى, ال شاحماتپەن بەس جاسىنان باستاپ اينالىسا باستاعان.
«شاحمات ويناۋ وزىمە قاتتى ۇنايدى. قارسىلاسىمدى جەڭۋ قولىمنان كەلدى, ويتكەنى ول باستاپقىدا-اق فيگۋراسىن بەرىپ قويعان ەدى. وسىدان كەيىن ۇزاعىراق ويلانىپ, ءار قيمىلىمدى ساناپ باستىم. ارينە, ونىڭ شابۋىلىنا قارسى تۇرا الامىن با دەپ ۋايىمداعانىم راس. بىراق قارسى تۇرا ءبىلىپ, ەندشپيلگە كوشتىم. وزىمدە ەكى پەشكا از بولسا دا قارسىلاسىمنىڭ پەشكاسىن, ارتىنشا ءپىلىن جەڭىپ الدىم. سول كەزدە بارىپ جەڭىلگەننەن باسقا امالى قالماعانىن ءبىلدى. ءوزىمنىڭ جەڭىسىمە سونداي قۋانىشتىمىن», دەپ كارىم ويىننان العان اسەرىمەن ءبولىستى.