ەلوردادا مادەنيەت جانە سپورت مينيسترلىگىنىڭ ۇيىمداستىرۋىمەن «جەڭىمپاز رۋحى» ۇلتتىق سپورت سىيلىعىن تابىستاۋ ءراسىمى ءوتتى.
سالتاناتتى كەش بارىسىندا مينيسترلىك تاريح قويناۋىنا ەنىپ بارا جاتقان 2022 جىلدى قورىتىندىلاپ, حالىقارالىق ارەنالاردا ءانۇرانىمىزدى شىرقاتىپ, كوك تۋىمىزدى كوكتە جەلبىرەتكەن سپورتشىلاردى ماراپاتتادى. سونداي-اق ولاردىڭ باپكەرلەرى مەن سپورتتىڭ سان ءتۇرلى سالاسىندا قازاق سپورتىنىڭ وركەندەۋىنە ءوز ۇلەسىن قوسىپ جۇرگەن جاندار دا سىيلىقتان قۇرالاقان قالعان جوق. سونىمەن قاتار مادەنيەت جانە سپورت مينيسترىلىگى سپورتشىلاردىڭ ايتۋلى جەڭىسىن باق ارقىلى ناسيحاتتاپ جۇرگەن سپورت جۋرناليستەرىن دە نازاردان تىس قالدىرعان جوق.
سونىمەن, ءىس-شارانىڭ قورىتىندىسى بويىنشا ايەلدەر كۇرەسىنەن ەكى دۇركىن ازيا چەمپيونى, الەم بىرىنشىلىگىنىڭ كۇمىس جۇلدەگەرى ءجاميلا باقبەرگەنوۆا (جازعى سپورت تۇرلەرىنەن) مەن بەيجىڭ پاراليمپياداسىنىڭ قولا مەدال يەگەرى الەكساندر گەرليتس (قىسقى سپورت تۇرلەرىنەن) «جىلدىڭ ۇزدىك سپورتشىسى» اتانسا, ولاردىڭ جەكە باپكەرلەرى نۇرسۇلتان تەمىروۆ (جازعى) پەن انتون جدانوۆيچ (قىسقى) «جىلدىڭ ۇزدىك جاتتىقتىرۋشىسى» اتالىمىنا يە بولدى. سونداي-اق ۇلتتىق كونكي تەبۋشىلەر فەدەراتسياسى – «جىلدىڭ ۇزدىك اككرەديتتەلگەن سپورت فەدەراتسياسى», اتىراۋ وبلىسى «مۇگەدەكتەردىڭ سپورت ۇيىمى» – «جىلدىڭ ۇزدىك سپورت مەكەمەسى», قاراعاندى وبلىسىنىڭ دەنە شىنىقتىرۋ جانە سپورت باسقارماسى – «جىلدىڭ ۇزدىك سپورت ءوڭىرى», داستان بالابەكوۆ – «اۋىلداعى ۇزدىك جاتتىقتىرۋشى», يرينا نوۆيكوۆا مەن ەلەنا گاليتس – «دەنە شىنىقتىرۋ جانە سپورت ءبولىمىنىڭ ۇزدىك مامانى», سامات ساپيشەۆ – «جىلدىڭ ۇزدىك بالالار جاتتىقتىرۋشىسى», «قۋانىش» ۆولەيبول كلۋبى – «ويىن تۇرلەرى بويىنشا ۇزدىك سپورت كومانداسى», بەكجان ادامبەكوۆ – «اۋىلداعى ۇزدىك دەنە شىنىقتىرۋ جانە سپورت ءبولىمىنىڭ ادىسكەرى», ەلەنا رىباكينا – «جىل جاڭالىعى», قايىربەك حامزين – «جىلدىڭ ۇزدىك مەتسەناتى» جانە الان قۇرمانعاليەۆ (ۇستەل تەننيسى), ەۆگەني فەدوروۆ (ۆەلوسپورت), ماريا بروۆكوۆا (كانوەدە ەسكەك ەسۋ) – «جاستار مەن جاسوسپىرىمدەر اراسىنداعى ۇزدىك سپورتشى» دەپ تانىلدى.
ال جىلدىڭ ەڭ ۇزدىك سپورت جۋرناليسىنە بەرىلەتىن «سەيداحمەت بەردىقۇلوۆ اتىنداعى ۇزدىك سپورت ءجۋرناليسى» اتالىمى بويىنشا «Egemen Qazaqstan» ءتىلشىسى عالىم سۇلەيمەن ۇزدىك شىقتى. سونداي-اق اسلان قاجەنوۆ (ۇزدىك تەلەۆيزيالىق رەپورتاج) پەن بەك تولەۋوۆ (ۇزدىك جاريالانىم) تە جۇلدەگەرلەر قاتارىنان كورىندى.
ايتا كەتەيىك, جەڭىمپازدار مادەنيەت جانە سپورت مينيسترلىگى تاراپىنان ءبىر ميلليون تەڭگە كولەمىندە قارجىلاي سىياقىمەن ماراپاتتالدى.