الماتىداعى بالۋان شولاق اتىنداعى سپورت سارايىندا شاحماتتىڭ راپيد جانە بليتس تۇرلەرى بويىنشا كەزەكتى الەم چەمپيوناتىنىڭ جالاۋى جەلبىرەدى. ەلىمىزدە تۇڭعىش رەت ۇيىمداستىرىلىپ جاتقان ويلىلار ويىنىنا ەرلەر اراسىنداعى الەمدىك رەيتينگتىڭ كوشباسشىسى نورۆەگيالىق ماگنۋس كارلسەن جانە ايەلدەر اراسىنداعى داڭقتى شاحماتشى الەكساندرا گورياچكينادان بولەك, جەر-جاھاننىڭ ءار قيىرىنان جينالعان 250-گە تارتا ويىنشى قاتىسىپ جاتىر.
چەمپيوناتتىڭ رەسمي اشىلۋ سالتاناتىنا مادەنيەت جانە سپورت ءمينيسترى داۋرەن اباەۆ, حالىقارالىق شاحمات فەدەراتسياسىنىڭ پرەزيدەنتى اركادي دۆوركوۆيچ, الماتى قالاسىنىڭ اكىمى ەربولات دوساەۆ جانە تاعى باسقا جارىستىڭ رەسمي تۇلعالارى قاتىستى. داۋرەن اباەۆ مەملەكەت باسشىسى قاسىم-جومارت توقاەۆتىڭ اتىنان قۇتتىقتاۋ ءسوزىن وقىپ بەردى.
جالپى, 1998 جىلدان بەرى تۇراقتى تۇردە ۇيىمداستىرىلىپ كەلە جاتقان شاحماتشىلاردىڭ الەم چەمپيوناتىنا قاتىسۋ باقىتى كەز كەلگەن سپورتشىعا بۇيىرا بەرمەيدى. سوندىقتان ۇيىمداستىرۋشىلار جىلدىڭ ەڭ ماڭىزدى تۋرنيرىنە تەك جىل بويى جوعارى ناتيجە كورسەتىپ, ءوز مىقتىلىعىن دالەلدەگەن شاحماتشىلاردى عانا شاقىرادى. ياعني ەرلەر اراسىنداعى الەم بىرىنشىلىگىنە قاتىسۋ ءۇشىن ولاردىڭ الەمدىك رەيتينگتەگى ۇپايى 2550-دەن از بولماۋى كەرەك. ال ايەلدەر اراسىنداعى دوداعا قاتىسۋ ءۇشىن شاحماتشى قىزدارعا جىل بويى 2250 ۇپاي جيناۋ قاجەت بولادى.
الاتاۋ باۋرايىندا العاش رەت ءوتىپ جاتقان ءدۇبىرلى دودانىڭ ەرلەر اراسىنداعى باسەكەسىندە ماگنۋس كارلسەن (نورۆەگيا, جەلتوقسان ايىنداعى الەم رەيتينگىندەگى ۇپايى 2859), حيكارا ناكامۋرا (اقش, 2768), فابيانا كارۋانا (اقش, 2766), يان نەپومنياششي (FIDE, 2793), انيش گيري (نيدەرلاند, 2764), الەكساندر گريششۋك (فيدە, 2745), شاحريار مامەدياروۆ (ازەربايجان, 2740), يان-كشيشتوف دۋدا (پولشا, 2729), يۋي ياني (قىتاي, 2728) جانە بىلتىر پولشادا وتكەن الەم چەمپيوناتىنىڭ قازىرگى چەمپيونى – ماكسيم ۆاشە-لاگراۆ (فرانتسيا, 2737, بليتس), سونىمەن قاتار باسقا دا اتاقتى شاحماتشىلار سىنعا ءتۇسىپ جاتىر.
ال ايەلدەر اراسىندا الەكساندرا گورياچكينا (فيدە, 2584), كاتەرينا لاگنو (فيدە, 2563), حامپي كونەرۋ ء(ۇندىستان, 2572), تان جونگۋي (قىتاي, 2518), نانا دزاگنيدزە (گرۋزيا, 2517), حاريكا دروناۆالي ء(ۇندىستان, 2507), جانسايا ابدىمالىك (قازاقستان, 2496), ساراسادات حامەدالشارەح (يران, 2490), انتوانەتا ستەفانوۆا (بولگاريا, 2442), قازىرگى چەمپيوندار الەكساندرا كوستەينيۋك (فيدە, 2520 – راپيد) جانە ءبيبىسارا اساۋباەۆا (قازاقستان, 2440) سياقتى داڭقتى سپورتشىلار جانە دە باسقا دا مىقتى شاحماتشىلار وينايدى.
ءبيبىسارا اساۋباەۆادان بولەك, بيىلعى الەم چەمپيوناتىنا قازاقستان قۇراماسىنان رينات جۇماباەۆ, جانسايا ابدىمالىك (رەيتينگتە 2496 ۇپايى بار), دينارا سادۋاقاسوۆا, ءبيبىسارا اساۋباەۆا (2440 ۇپاي), سونىمەن قاتار گ ۇلىسحان ناقباەۆا, قازىبەك نوگەربەك, اسەل سەرىكباي سىندى 40-تان اسا وتانداسىمىز قاتىسىپ جاتىر.
ءتۋرنيردى ۇيىمداستىرۋشىلار – حالىقارالىق شاحمات فەدەراتسياسى (FIDE) مەن قازاقستان شاحمات فەدەراتسياسى. الەم بىرىنشىلىگى الماتى قالاسى اكىمدىگىنىڭ جانە مادەنيەت جانە سپورت مينيسترلىگىنىڭ قولداۋىمەن وتكىزىلىپ جاتىر. جارىستىڭ جالپى جۇلدە قورى – 1 ملن اقش دوللارىن قۇراپ وتىر.