قىمباتشىلىق قوس وكپەدەن قىسقان زاماندا مەملەكەت باسشىسىنىڭ «ەگىستىكتەن سورەگە دەيىن» كووپەراتسيالىق تىزبەگىن ۇلكەن شاھارلاردا دامىتۋدىڭ ماڭىزى زور. جاڭا جىل قارساڭىندا كەرەكۋ قالاسىندا شارۋالاردىڭ ءونىمىن تۇتىنۋشىعا تىكەلەي ساتۋعا مۇمكىندىك بەرەتىن «Jailau» اتتى فەرمەرلىك بازار اشىلدى.
مۇندا زامانعا ساي بازار عيماراتى, ازىق-ت ۇلىك قويماسى جانە دالادا ساۋدا پاۆيلوندارى ورنالاسقان. ءار سەنبى سايىن وڭىردەگى شارۋاشىلىقتار جينالىپ, جارمەڭكە وتكىزەدى. ال جابىق بازاردىڭ ءوزى اپتانىڭ 6 كۇنىندە جۇمىس ىستەپ, تۇتىنۋشىلارعا ازىق-ت ۇلىك تاۋارلارىن جەرگىلىكتى نارىقتاعىدان 15-20 پايىزعا ارزانعا ساتادى. ساۋدا ورىندارىن جالعا الاتىن كاسىپكەرلەر شارشى مەترى ءۇشىن ايىنا نەبارى 2000 تەڭگە تولەيدى ەكەن. مۇنداي جەڭىلدىك ازىق-ت ۇلىك ءوندىرۋ سالاسىنداعى ءىرى وندىرۋشىلەر مەن تانىمال برەندتەردى قىزىقتىرىپ وتىرعانعا ۇقسايدى. قازىردىڭ وزىندە ىشتەگى ورىندارعا 32 كاسىپكەر جايعاسىپ ۇلگەرىپتى.
«Jailau» بازارىنىڭ اشىلۋ كۇنى 8 اۋداننىڭ شارۋالارى ءوز ونىمدەرىن تىكەلەي ساۋدالاپ, تۇرعىنداردى اۋىلدىڭ بەرەكەسىنە قارىق قىلدى. كارتوپ پەن قىرىققابات, ءسابىزدىڭ كيلوسى 95 تەڭگەدەن, ءبىرىنشى سۇرىپتى جۇمىرتقانىڭ وندىعى - 450, ءسۇتتىڭ ءليترى 170 تەڭگەدەن بوساتىلدى. جارمەڭكەدە ەت تە ارزان, سيىردىڭ جۇمساق ەتى مەن قويدىڭ جامباسى - 2000, جىلقىنىڭ قازىسى 2300 تەڭگەدەن ساتىلىپ جاتقانىن بايقادىق. جارما ونىمدەرى, كۇنباعىس مايى, تاۋىق جانە قاز ەتتەرى, جوعارى سۇرىپتى ۇن, قۇرت-قايماق, سارى مايدىڭ ءتۇر-ءتۇرى سورەلەردە سامساپ, جۇرت تالاسا-تارماسا ساتىپ الدى.