استانا مەن الماتىدا «سامۇرىق-قازىنا» قورىنىڭ وكىلدەرى جاڭا جىلدى ونكولوگيالىق ورتالىقتا قارسى الاتىن بالالاردى مەرەكەمەن قۇتتىقتادى, دەپ حابارلايدى Egemen.kz.
ەلىمىزدە «ۇلكەندى سەن سىيلاساڭ, كىشى سەنى سىيلايدى. كىشىنى سەن سىيلاساڭ كىسى سەنى سىيلايدى» دەگەن كەرەمەت ءسوز بار. بۇگىنگى كەزدەسۋلەر وسى ءسوز بەن تۇسىنىكتىڭ تەرەڭدىگىن ەسكە ءتۇسىردى.
«سامۇرىق-قازىنا» اق كومپانيالار توبى قايىرىمدىلىق قىزمەتىنىڭ بىرىڭعاي وپەراتورى – «Samruk-Kazyna Trust» قورىنىڭ باستاماسىمەن ۇيىمداستىرىلعان شارادا استاناداعى انا مەن بالا ۇلتتىق عىلىمي ورتالىعى مەن الماتى قالاسىنداعى پەدياتريا جانە بالالار حيرۋرگياسى عىلىمي ورتالىعىندا وڭالتۋدان ءوتىپ جاتقان 310 بالاعا جاڭاجىلدىق سىيلىقتار مەن سەرتيفيكاتتار تارتۋ ەتىلدى.
ماسەلەن, بۇگىن الماتىداعى ورتالىقتا ونكولوگيالىق اۋرۋلارى بار 155 بالا ەم الىپ جاتىر. وسى بالالارعا ەنشىلەس كومپانيالار اتىنان قوردىڭ قوعاممەن بايلانىس, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ جاڭاجىلدىق سەرتيفيكاتتار تابىستاپ, اتا-انالارىمەن تىلدەستى.
«قازىر ەلىمىزدە مەديتسينا سالاسى جوعارى دەڭگەيدە. مىقتى قۇرال-جابدىقتار بار. دارىگەرلەرىمىز دە وتە بىلىكتى. سوندىقتان وسى سىناقتان تەز ءوتىپ, ومىرلەرىڭىزدە جارقىن كەزەڭدەر مول بولسىن!», دەدى عيبرات اۋعانوۆ.
ءدال وسى كۇنى استانا قالاسىنىڭ انا مەن بالا ۇلتتىق عىلىمي ورتالىعى دا جاڭاجىلدىق كوڭىل-كۇيگە بولەندى. بۇل جەردە دە وڭالتۋدان ءوتىپ جاتقان 155 بالاعا ارنايى سەرتيفيكاتتار بەرىلدى.
قۇنى 50 000 تەڭگەلىك سەرتيفيكاتتار ارقىلى اتا-انالار بالالارىمەن اقىلداسىپ, وزدەرى تاڭداعان كەز-كەلگەن سىيلىقتى «بالالار الەمى» دۇكەندەر جەلىسىنەن ساتىپ الا الادى.
سونىمەن قاتار ەلورداداعى پسيحولوگيالىق-پەداگوگيكالىق تۇزەتۋ كابينەتىندەگى 500 ەرەكشە بالا دا سىيلىقسىز قالمادى. «Samruk-Kazyna Trust» قورىنىڭ باس ديرەكتورى الفيا اديەۆا جەتكىنشەكتەرگە تاتتىلەر جيىنتىعىن ۇلەستىردى.
«ارماندار ورىندالۋ كەرەك. ال ءبىز, ەرەسەكتەر, بۇل جولدا بارىنشا كۇش سالاتىن بولامىز. ءبارى مۇمكىن, تەك ارمانداي بىلىڭدەر. بارشاڭا مىقتى دەنساۋلىق پەن عاجايىپقا دەگەن سەنىم تىلەيمىن», دەدى الفيا اديەۆا.
قايىرىمدىلىقتىڭ باسىم باعىتتارى دەنساۋلىق ساقتاۋ, ءبىلىم بەرۋ, بۇقارالىق سپورتتى دامىتۋ جانە ازاماتتاردىڭ الەۋمەتتىك وسال توپتارىن قولداۋعا نەگىزدەلگەن.