«Egemen Qazaqstan» گازەتى مەن ا.بايتۇرسىن ۇلى اتىنداعى ءتىل ءبىلىمى ينستيتۋتى بىرلەسىپ, «باق جانە جازبا ءتىلى: ساۋاتتىلىقتى شىڭداۋ» اتتى عىلىمي-تاجىريبەلىك سەمينار وتكىزدى, دەپ حابارلايدى Egemen.kz.
Zoom پلاتفورماسى ارقىلى ونلاين فورماتتا وتكەن عىلىمي-تاجىريبەلىك سەمينارعا ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى انار فاسىلجان, ينستيتۋتتىڭ باس عىلىمي قىزمەتكەرى, ف.ع.د., پروفەسسور نۇرگەلدى ءۋالي, ينستيتۋتتىڭ باس عىلىمي قىزمەتكەرى, ف.ع.د., پروفەسسور ايمان الداش, ف.ع.د., پروفەسسور قۇرالاي كۇدەرينوۆا, ف.ع.ك., عىلىمي قىزمەتكەر اينۇر قارشىعاەۆا, ف.ع.د., دوتسەنت قىزدارحان رىسبەرگەن, پروفەسسور باعدان مومىنوۆا, ف.ع.ك., جەتەكشى عىلىمي قىزمەتكەر سارسەنباي قۇلمانوۆ, كىشى عىلىمي قىزمەتكەر ەركىن بەسىروۆ, «ەگەمەن قازاقستان» رگ» جشس باس ديرەكتورى ديحان قامزابەك ۇلى, باس ديرەكتوردىڭ ورىنباسارى قامبار احمەت جانە رەداكتسيا تىلشىلەرى قاتىستى.
ەكى ساعاتقا سوزىلعان مازمۇندى كەزدەسۋدە وتاندىق باق سالاسىنداعى وزەكتى ماسەلەلەر كەڭ ءارى اشىق تالقىلاندى. ساراپشىلار گازەت بەتتەرىندە كەزدەسەتىن گرامماتيكالىق جانە ستيليستيكالىق قاتەلەردى تالداپ, جۋرناليستەردىڭ سۇراقتارىنا جاۋاپ بەردى.
سەمينار بارىسىندا ءسوز سويلەگەن پروفەسسور ايمان الداشتىڭ ايتۋىنشا, بۇگىندە وتاندىق باق سالاسىندا «Egemen Qazaqstan» گازەتى ايرىقشا بەدەلگە يە.
- «Egemen Qazaqstan» - پۋبليتسيستيكالىق ستيلدە قازاق ءسوزىنىڭ بايلىعى مەن ءتىلدىڭ ومىرشەڭدىگىن, الەۋەتىن تانىپ كەلە جاتقان, ءتىلدى ناسيحاتتايتىن, ەملە نورمالارى ساقتالاتىن, وسى ارقىلى جوعارى ساۋاتتىلىقتىڭ ورنىعۋىنا مول ۇلەس قوساتىن باسىلىم», - دەدى پروفەسسور.
ايمان الداش اتاپ وتكەندەي, جازبا تىلىندە ورنىققان ەرەجەلەر مەن ەملەلەر كۇندەلىكتى ومىردە دە دۇرىس ساقتالمايدى. باسىلىمداعى قاتەلەر وقىرمانداردىڭ ساۋاتتىلىعىنا تۇتاس اسەر ەتەدى. سوندىقتان جۋرناليستەردىڭ ساۋاتتىلىعىن كوتەرۋ - قازىرگى قوعامداعى وزەكتى ماسەلە.
بۇدان سوڭ, ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ گرامماتيكا ءبولىمىنىڭ مەڭگەرۋشىسى, پروفەسسور باعدان مومىنوۆا جۋرناليستەرمەن تۇششىمدى اڭگىمە قۇرىپ, كالكا اۋدارۋ, ماتىندەگى ەتيكانى ساقتاۋ, جالپى ستيليستيكا بويىنشا ۇسىنىستارىن ايتتى.
سونداي-اق كونفەرەنتسيا بارىسىندا ءتىل ءبىلىمى ينستيتۋتىنىڭ جەتەكشى عىلىمي قىزمەتكەرى سارسەنباي قۇلمانوۆ گازەتتەردە تەرميندەردىڭ قولدانىلۋى تۋرالى بايانداما جاسادى.
ايتا كەتسەك, باس باسىلىم تىلشىلەرىنە «قازاق ءتىلىنىڭ ۇلتتىق كورپۋسى» سايتى تانىستىرىلدى. اتالعان سايتتا قازاق ءتىلىنىڭ ەلەكتروندى ماتىندىك قورى جيناقتالعان. پلاتفورمادان ءسوز بويىنشا ىزدەۋ جۇرگىزىپ, سول ءسوز قولدانىلعان سويلەمدەردىڭ ءتىزىمىن جانە ولاردىڭ دەرەككوزىن كورۋگە بولادى.