تاڭ اتار-اتپاستان «ابەكەڭ, امانگەلدى ايتالى دوسىڭ قايتىس بولدى...» دەگەن قارالى حابار قابىرعامدى قايىستىردى. اۋرۋحاناعا تۇسكەلى بەرى وزىمەن ءبىر سويلەسە الماي, قالىڭ ويدا ءجۇر ەدىم. زايىبى گۇلەكەڭمەن حابارلاسىپ قانا وتىردىق. استانادان ارنايى بارعان بالاسى ايدار دا جانساقتاۋ بولىمىنە زورعا كىرىپتى.
وتاندىق عالىمداردىڭ اراسىندا امانگەلدى ايتالىنىڭ ورنى بولەك ەدى. ونىڭ ايقىن تاقىرىبى حالقىمىزدىڭ رۋحاني سالاسى بولدى. بۇل تەگىننەن تەگىن ەمەس-تۇعىن. الدىمەن پاتشالىق رەسەيدىڭ, سونىڭ ساياسي جالعاسىنداي بولعان كەڭەستىك جۇيە حالقىمىزدىڭ ۇلتتىق رۋحىنىڭ نەگىزى – تىلىمىزگە ءتيىسىپ, دىنىمىزگە شابۋىل جاساپ, ۇلتتىق سانامىزدى سۋ الدىرىپ, جۇرداي ەتۋگە تىرىستى. سول سەبەپتى امانگەلدى ايتالىنىڭ 2000 جىلى العاش شىققان «ۇلتتانۋ» وقۋ قۇرالىنان باستاپ 2019 جىلى جارىق كورگەن «رۋحاني كەمەلدىك» جيناعىنا دەيىن كىتاپتارىندا, جازعان ماقالالارىندا قوزعاعانى مەملەكەت, مادەنيەت, يدەولوگيا, ءتىل, ءدىن, تاعى باسقا رۋحاني دۇنيەمىزگە قاتىستى ماسەلەلەر بولدى. وسى نازىك تاقىرىپتاردى مايدان قىل تارتقانداي بارىنشا شەبەرلىكپەن وقىرمان ساناسىنا جەتكىزە ءبىلدى.
ابەكەڭ وتانشىل ازامات, زەردەلى عالىم ەدى. «Egemen Qazaqstan» گازەتىنىڭ جاقىندا عانا, 14 جەلتوقساندا جارىق كورگەن «ۋكراينا تاعدىرى: سەبەپ پەن ساباق» اتتى سوڭعى ماقالاسىندا «ىشكى جانە سىرتقى ساياساتىمىزدا دەربەستىگىمىز ۇنامايتىنداردىڭ قىتىعىنا تيمەي, ىزاسىن كەلتىرمەي, ەكىنشى جاعىنان, ءوز ۇپايىمىزدى جىبەرمەيتىن جولدى قايتا-قايتا انىقتايىق» دەۋى دە ءوز حالقىن شىنايى سۇيگەن عالىمنىڭ جۇرەكجاردى ءسوزى بولاتىن.
قايىر حوش, ابەكە! جاتقان جەرىڭىز جايلى, توپىراعىڭىز تورقا بولىپ, يمان نۇرىڭىز پەيىشتىڭ تورىندە شالقىسىن!
ابدىجالەل باكىر,
ساياسي عىلىمدار دوكتورى, پروفەسسور