بالالارعا مەكتەپكە دەيىنگى ءبىلىم بەرۋدىڭ قولجەتىمدىلىگى ماسەلەسى ەلوردادا ەرەكشە باقىلاۋدا. قالادا 432 بالاباقشا جۇمىس ىستەيدى. تاربيەلەنۋشىلەردى كوبىرەك قامتۋدى قامتاماسىز ەتۋ ءۇشىن جىل سايىن ءبىلىم بەرۋ مەكەمەلەرىندەگى ورىندار سانى ارتىپ كەلەدى. استانا اكىمىنىڭ ورىنباسارى ەسەت بايكەن ونلاين-بريفينگتە وسى باعىتتا جۇرگىزىلىپ جاتقان جۇمىستار تۋرالى ايتىپ بەردى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
بۇگىنگى تاڭدا استانادا 432 مەكتەپكە دەيىنگى مەكەمە جۇمىس ىستەيدى. ونىڭ ىشىندە 99 مەملەكەتتىك مەكەمە, وندا 31 464 بالا تاربيەلەنۋدە. 330-ى جەكەمەنشىك بالاباقشا, وندا 26 171 بالا وقيدى.
ەلوردادا ءبىر جاستان 6 جاسقا دەيىنگى بالالاردى مەكتەپكە دەيىنگى تاربيەمەن جانە وقىتۋمەن قامتۋ 81% نەمەسە 58 129 ادامدى قۇرايدى.
اكىم ورىنباسارىنىڭ مالىمەتىنە سايكەس, قالادا مەكتەپكە دەيىنگى ءبىلىم بەرۋ مەكەمەلەرىندەگى ورىنداردىڭ سانىن كوبەيتۋ بويىنشا بەلسەندى جۇمىس جۇرگىزىلۋدە. ماسەلەن, 2022 جىلى ءۇش مىڭ ورىن قۇرىلدى, ونىڭ ىشىندە:
- 200 ورىندىق جەكەمەنشىك بالاباقشالاردا ءبىلىم بەرۋ قىزمەتتەرىن الۋشىلار (ۆاۋچەر) بويىنشا دەربەستەندىرىلگەن قارجىلاندىرۋدى ەسكەرە وتىرىپ, مەكتەپكە دەيىنگى تاربيە مەن وقىتۋ بويىنشا پيلوتتىق جوبا ەنگىزىلدى;
- 150 ورىندىق № 32 «بالداۋرەن» بوبەكجايىن كەڭەيتۋ جۇمىستارى باستالدى;
- جۇمىس ىستەپ تۇرعان بالاباقشالاردا 320 ورىندىق قوسىمشا توپتار اشىلدى (№ 71 ء«مولدىر», № 76 «ادەمى», № 53 «مەرەي», № 66 «تولاعاي», № 93 «ايگولەك», № 27 «بالاۋسا»);
- جاعالاۋ تۇرعىن الابىندا 290 ورىندىق بالاباقشا پايدالانۋعا بەرىلدى;
- جۇمىس ىستەپ تۇرعان 24 مەكتەپكە دەيىنگى ۇيىمداردا 219 ورىنعا ارنالعان ەرەكشە ءبىلىم بەرۋ قاجەتتىلىكتەرى بار بالالارعا ارنالعان قوسىمشا ينكليۋزيۆتى توپتار اشىلدى;
- بيىل بالاباقشالاردا بارلىق جاسقا ارنالعان 1820 ورىندىق توپتار قۇرىلدى.
«بالالاردى بارىنشا قامتۋ ماقساتىندا كەلەسى جىلى مەملەكەتتىك تاپسىرىس بويىنشا بالاباقشالاردا تاعى 10 مىڭعا جۋىق قوسىمشا ورىن اشۋ جوسپارلانۋدا», دەدى ەسەت بايكەن.