وزبەكستاننىڭ بەينەلەۋ ونەرى گالەرەياسىندا اقىن ابايدىڭ ءومىرى مەن شىعارماشىلىعىنا ارنالعان «اباي. باۋىرلاس حالىقتاردىڭ مۇراسى» اتتى كورمە اشىلدى. رۋحاني ءىس-شارانىڭ اشىلۋ سالتاناتىنا وزبەكستان پرەمەر-ءمينيسترىنىڭ ورىنباسارى, تۋريزم جانە مادەني مۇرا ءمينيسترى ءازيز ابدىحاقىموۆ, قازاقستاننىڭ مادەنيەت جانە سپورت ءمينيسترى داۋرەن اباەۆ, قازاقستاننىڭ وزبەكستانداعى توتەنشە جانە وكىلەتتى ەلشىسى بەيبىت اتامقۇلوۆ, «جيدەباي-ءبورىلى» اباي مۋزەيىنىڭ ديرەكتورى تۇردىقۇل شانباي, بەينەلەۋ ونەرى گالەرەياسىنىڭ ديرەكتورى كامولا اكيلوۆا جانە زيالى قاۋىم وكىلدەرى قاتىستى. سونداي-اق تاشكەنت قالاسىندا اباي قۇنانباي ۇلى ەسكەرتكىشىنە گۇل شوقتارىن قويۋ ءراسىمى ءوتتى.
قازاقستاننىڭ مادەنيەت جانە سپورت ءمينيسترى داۋرەن اباەۆ كورمە جۇمىسىن ۇيىمداستىرعانى ءۇشىن كورشىلەس ەل تاراپىنا العىس ايتتى.
«الىشەر ناۋاي مەن ابايدىڭ شىعارماشىلىعى – جالپى ادامزات قۇندىلىقتارىنىڭ قالىپتاسۋ ۇلگىسىن بەينەلەيتىن ۇلى مۇرا. ەكى ويشىل ءارتۇرلى ۋاقىتتا ءومىر سۇرسە دە, ولاردى گۋمانيزمگە دەگەن ۇمتىلىس پەن پوەزياداعى رەفورماتورلىق رۋح بىرىكتىرەدى. ەكەۋى دە باۋىرلاس حالىقتىڭ رۋحاني تىرەگى», دەدى مينيستر.
ال وزبەكستان پرەمەر-ءمينيسترىنىڭ ورىنباسارى, تۋريزم جانە مادەني مۇرا ءمينيسترى ءازيز ابدىحاقىموۆ قازىرگى ۋاقىتتا تۇركى حالىقتارىنىڭ مادەني جادىگەرلەرىن ساقتاۋ جانە قالپىنا كەلتىرۋ بويىنشا ۇلكەن جۇمىستار جۇرگىزىلىپ جاتقانىن اتاپ ءوتتى.
«قازاقتىڭ ۇلكەن ويشىلى ابايدىڭ شىعارماشىلىعىنا ارنالعان كورمەنىڭ اشىلۋى – وزبەكستان مەن قازاقستان اراسىنداعى دوستىقتىڭ نىعايىپ كەلە جاتقانىن ايعاقتايدى. وسى مۇمكىندىكتى پايدالانا وتىرىپ, قازاقستاننىڭ مادەنيەت جانە سپورت ءمينيسترى داۋرەن اباەۆقا «وزبەكستانعا قوش كەلدىڭىز» دەپ ايتقىم كەلەدى. بۇگىن اشىلعان كورمە ۇلى ويشىل الىشەر ءناۋايدىڭ گۋمانيستىك داستۇرلەرىن ساقتاعان اباي شىعارماشىلىعىن جاقسى تۇسىنۋگە مۇمكىندىك بەرەتىنىنە سەنىمدىمىز. ونىڭ شىعىس پەن باتىستىڭ بىرلىگى تۋرالى, الەمدىك مۇرانى يگەرۋ قاجەتتىلىگى, ەنتسيكلوپەديزمگە ۇمتىلۋ, ادام تابيعاتىن جەتىلدىرۋ تۋرالى يدەيالارى قازىرگى كەزەڭدە دە وزەكتىلىگىن جوعالتقان جوق», دەدى ءازيز ابدىحاقىموۆ.
باۋىرلاس ەلدە اشىلعان كورمە «كوشپەلى مادەنيەت ابايدىڭ قالىپتاسۋىنىڭ نەگىزگى فاكتورى رەتىندە», «الىشەر ءناۋايدىڭ ابايدى قالىپتاستىرۋداعى رۋحاني تالىمگەر رەتىندەگى ءرولى», «اباي ءومىرىنىڭ نەگىزگى كەزەڭدەرى», «سۋرەتشىلەر ءا.قاستەەۆ, و.تاڭسىقباەۆ, ە.سيدوركين, ن.وتەپباەۆ جانە ت.ب. شىعارمالارىنداعى اباي كەيىپكەرلەرى مەن سيۋجەتتەرى» اتتى بولىمدەردەن تۇرادى. وندا قازاقتىڭ ءداستۇرلى تۇرمىسى, ساندىك-قولدانبالى ونەرى, كەسكىندەمە, گرافيكا, اباي تۋرالى باسىلىمدار, ونىڭ شىعارمالارى ۇسىنىلعان.
ايتا كەتەيىك, «اباي. باۋىرلاس حالىقتاردىڭ مۇراسى» كورمەسى تاشكەنت قالاسىندا 19-30 جەلتوقسان كۇندەرى ارالىعىندا وتەدى.