حالىقتىڭ ينۆەستيتسيالىق مادەنيەتىن قالىپتاستىرۋ كەرەك - سەناتورلار

كەزدەسۋدە وتاندىق قور نارىعىن, ونىڭ ىشىندە باعالى قاعازدار نارىعىنىڭ ينفراقۇرىلىمىن دامىتۋدىڭ, ينستيتۋتسيونالدىق جانە بولشەك ينۆەستورلاردى تارتۋدىڭ, قازاقستان قور بيرجاسى قىزمەتىنىڭ وزەكتى ماسەلەلەرى تالقىلاندى. سەناتورلارعا سونداي-اق IPO وتكىزۋدىڭ الدىن الا قورىتىندىلارى جانە كۆازيمەملەكەتتىك سەكتور سۋبەكتىلەرىنىڭ اكتسيالاردى جاريا ورنالاستىرۋعا شىعارۋ جوسپارى تۋرالى ايتىلدى.

كوميتەت توراعاسى داۋرەن ادىلبەكوۆ كەزدەسۋ بارىسىندا مەملەكەت باسشىسى مەملەكەتتىك ورگانداردىڭ الدىنا وتاندىق قور نارىعىن بەلسەندى دامىتۋ مىندەتىن العا قويعانىن اتاپ ءوتتى.

«پرەزيدەنت قاسىم-جومارت كەمەل ۇلى توقاەۆ ەلىمىزدىڭ ازاماتتارى ۇلتتىق كومپانيالاردىڭ اكتسيالارىن ساتىپ الىپ, ديۆيدەندتەر الۋى ءتيىس ەكەنىن اتاپ ءوتتى. بۇل حالىقتىڭ ينۆەستيتسيالىق مادەنيەتىن قالىپتاستىرۋ جانە IPO-عا قاتىسۋدىڭ قولجەتىمدىلىگىن ارتتىرۋ قاجەتتىگىن كورسەتەدى. ۇلتتىق كومپانيا اكتيۆتەرىن باسەكەلەستەر ورتاسىنا شىعارۋ مەملەكەتتىڭ ەكونوميكاعا قاتىسۋىن ازايتۋعا مۇمكىندىك بەرەتىنى بەلگىلى. مۇنداي شارالار ۇلتتىق كومپانيالارعا دەگەن سەنىمدى ارتتىرادى جانە ولاردىڭ دامۋىنا ىقپال ەتەدى دەپ سانايمىن», دەدى سەناتور.

KASE وكىلى ءوز كەزەگىندە بيرجانىڭ 4 نارىققا قىزمەت كورسەتەتىنى تۋرالى پارلامەنتشىلەرگە ايتىپ بەردى. ولاردىڭ ىشىندە قور, اقشا, ۆاليۋتا جانە تۋىندى قۇرالدار نارىعى بار. 2022 جىلدىڭ 11 ايىنىڭ قورىتىندىسى بويىنشا بۇكىل نارىقتاعى ساۋدا-ساتتىقتىڭ جالپى كولەمى وتكەن جىلدىڭ ءتيىستى كەزەڭىمەن سالىستىرعاندا 59%-عا ءوسىپ, 235,5 ترلن تەڭگەنى قۇرادى. 

قازىرگى ۋاقىتتا KASE-دە مامىلە جاساسۋ ءۇشىن جارتى ميلليوننان استام قازاقستاندىقتىڭ ينۆەستيتسيالىق شوتى بار ەكەنى دە ايتىلدى. ولاردىڭ بيرجا اكتسياسىنداعى ساۋدا-ساتتىق ۇلەسى شامامەن 50% قۇراپ وتىر. بۇل رەتتە 2022 جىلدىڭ 11 ايىندا نارىقتى 22,6 ترلن تەڭگەگە كاپيتالداندىرۋ كەزىندە KASE-دەگى اكتسيامەن ساۋدا-ساتتىق كولەمى 108 ملرد تەڭگەنى قۇرادى.

كەزدەسۋدە «قازمۇنايگاز» ۇلتتىق كومپانياسى» اق, «سامۇرىق-قازىنا «ۇاق» اق, سونداي-اق قارجى نارىعىن رەتتەۋ جانە دامىتۋ اگەنتتىگىنىڭ وكىلدەرى دە بايانداما جاسادى.