بۇگىن, ياعني 19 جەلتوقساندا ەلوردادا EXPO كورمە كەشەنىنىڭ الاڭىندا ەلىمىزدىڭ باستى شىرشاسىن جاعۋ ءراسىمى ءوتتى, دەپ حابارلايدى Egemen.kz استانا اكىمدىگىنىڭ رەسمي سايتىنا سىلتەمە جاساپ.
شىرشانىڭ بيىكتىگى — 25 مەتر. ول جۇزدەگەن شامشىراقپەن بەزەندىرىلگەن. مەرەكەنىڭ باستى اتريبۋتىن بەزەندىرۋدە 750 مەتر گيرلياند, 360 بىرلىك جارىقشام جانە 900-دەن استام شىرشا شارى قولدانىلدى.
شىرشانى جاعۋ ءراسىمى باستالار الدىندا ەلوردا تۇرعىندارى مەن قوناقتارىنا «عاجايىپتار ءتۇنى» ەرتەگى مۇز شوۋى كورسەتىلدى. ەلىمىزدىڭ باستى شىرشاسىن بۇلدىرشىندەر, ەلوردا اكىمى جەڭىس قاسىمبەك, اياز اتا مەن اقشاقار بىرلەسە جاعىپ, ساحنادا قازاقستاندىق ارتىستەر جانە ت.ب. ونەر كورسەتتى.
«قۇرمەتتى ەلوردامىزدىڭ تۇرعىندارى مەن قوناقتارى, جاڭا جىل قارساڭىندا سىزدەرگە مەرەكەلىك كوڭىل-كۇي, قۋانىش, وتباسىلارىڭىزعا زور دەنساۋلىق تىلەيمىن! استانامىز دامىپ, وركەندەي بەرسىن! الداعى جىل قالا ءۇشىن بەرەكەلى بولسىن! بۇگىن جاڭا جىل مەرەكەسىن باستاعالى وتىرمىز. مۇنداي ءىس-شارالار ءالى دە كوپ بولادى. قالامىزدىڭ بارلىق اۋدانىندا مۇز ايدىندارى مەن سىرعاناقتار ورناتىلىپ جاتىر, وندا ءاربىر ادام بوس ۋاقىتىن كوڭىلدى وتكىزە الادى», دەدى استانا اكىمى جەڭىس قاسىمبەك.
ءىس-شارا Astana Muz Fest اۋقىمدى قىسقى فەستيۆالى اياسىندا وتكىزىلدى. بۇگىن مۇز ايدىندارى, سلايدتار, جاڭا جىلدىق جارمەڭكە جانە ت.ب. بار قىسقى قالا ءوز جۇمىسىن باستادى.